Регбиялъул рахъалъ Россиялъул тIаса бищараб командаялда гъорлъ Байзат ХIамидоваги гIахьаллъизе йиго исана рукIине ругел риидалил Олимпиялъул хIаязда. Токиоялда букIине бугеб Олимпиадаялде лицензия нилъер спортсменкабазе щвана
Монакоялда букIараб турниралда. Ахирисеб матчалда нилъераз 38:0 хIисабгун къезабуна Казахстаналъул руччабазул тIаса бищараб команда.
ХIамидова йиго Россиялъул командаялда гъорлъ бищунго цIикIкIун титулал, шапакъатал щварай регбистка. Гьей ккола щуцIул Европаялъул чемпионка, бергьенлъи босана Универсиадаялдаги.
Байзат ккола ЛъаратIа районалъул Ибрагьимотар росулъа. «ЕнисейСТМ» клубалъул гьужумалъулай Байзат «Регби-7» спортивияб тайпаялъул рахъалъ Россиялъул тIаса бищараб командаялда гъорлъ цее яхъана 10-ялдасаги цIикIкIун соналъ.
