Суалал кlвар бугел рорхана

Хунзахъ районалъул администрациялда тlобитlана ДРялъул Жамгlияб палатаялъул Советалъул данделъи. Гьелда гIахьаллъана республикаялъул Жамгlияб палатаялъул Председатель Гlабдулмуъмин Ибрагьимов, палатаялъул батlиял-батlиял комиссиязул председателал, гьезул заместителал ва цогидалги членалгун экспертал, микьго мугlрузул районазул Жамгlиял палатабазул председателал, Хунзахъ районалъул нухмалъулел ва цогидал. Аслияб къагlидаялда данделъиялда гьоркьоб лъун букlана мугlрузул районазул социалиябгун-экономикияб цебетlеялъул ва гьел районазда туризм цебетlеялъул суалал. Гьедин “Мугlрузулал территориязул социалиябгун-экономикияб цебетlей” абураб ДРялъул Пачалихъияб программа гlумруялде бахъинабиялда хурхараб докладгун цеве вахъана Жамгlияб палатаялъул АПКялъулгун экологиялъул комиссиялъул председатель Гlабдурахlман Чураев. Гьес гlатlидго бицана рехсараб програмаялда рекъон мугlрузул районал церетlеялъе риччалел ругел сурсатазул ва гьел хlалтlизарулаго дандчlвалел захlмалъабазул.

Мугlрузул районазда туризм цебетlеялъул ва гьелдалъун халкъалъе жеги пайда цlикlкlине ккани т1аг1инаризе кколел гlунгутlабазул бицана Жамгlияб палатаялъул лъай кьеялъулгун, культураялъул, спорталъул ва гlолилазул политикаялъул комиссиялъул председателасул заместитель Хъайтмаз Дибировас.

Хунзахъ райадминистрациялъул гlолилазул ишазул, туризмалъул ва спорталъул рахъалъ отделалъул начальник Шамай Гlумаровалъ бицана муниципалитеталда туризмалда сверухъ бугеб ахlвал-хlалалъул ва гьеб цебет1езаби мурадгун районалъул нухмалъиялъ гьабулеб бугеб хlалтlул. Гьелъул рагlабазда рекъон 2021 соналъ районалде вачlун вуго 190 азарго турист.

Гьединго цогидал кlалъаял гьаруразулги пикраби руссарал рукlана Дагъистаналъул росаби чlунтичlого рукlине ккани, гьенир гlадамазе, хасго гlолилазе хlажатал шартlал ва хlалтlул бакlал чlезариялда хурхун гьабулеб хlалтlи цlикlкlинабизе ккеялде. Хунзахъ районалъул бетlер Нурмухlамад Задиевас абуна туризм цебет1езабиялде руссарал программаби г1емер ругин. Амма батlи-батlиял гlиллабаздалъун жакъа гьел программабазда гъорлъ гlахьаллъиги гьабун, пачалихъалъ гьабулеб кумек къабул гьабизе г1емерисел хlадурун гьечlин. Данделъиялъул ахиралда цо-цо гьелъул гlахьалчагlаз кьуна жидерго суалалги.