«Дагъистан» РИАялда ДРялъул сахлъи цIуниялъул министр Татьяна Беляевагун ва ДРялъул бетIерав санитарияв тохтур Николай Павловгун дандчIвана журналистал. Гьениб бицана сахлъи цIуниялда хурхарал суалазул ва гьанжеялдаса нахъе маскаби рачIого къватIире рахъине бегьулеблъиялъул.
«Ахираб 15 анкь буго республикаялда коронавирусалъ ва пневмониялъ унтаразул къадар дагьлъулеб бугелдаса. Гьебго заманалда вакцинация гьабиялъул кIварги хун гьечIо. Кинавниги 1800000 чиясе вакцина гьабизе ккола республикаялда. Жакъаялде щвезегIан вакцина гьабуразул къадар миллионгун бащдалде бахана. Цадахъаб иммунитет цIуниялъе нилъее чара гьечIого хIажат буго бащдаб лъагIалида жаниб ревакцинация гьабизеги. Жакъа коронавирусалде данде республикаялда коллективияб иммунитет буго халкъалъул 34 проценталъул. Республикаялъул халкъалда абизе бокьун буго, ревакцинация гьабизе заман щвараз гьеб нахъ бахъичIого гьабеян. Щайгурелъул июналда коронавирусалъ унтаразул къадар цIикIкIине рес бугин абулеб бугелъул инфекционистаз. Улкаялъул цо-цо регионазда унтаразул къадар цIикIкIунебцин буго. ХIисаб гьабизе ккела гьаб заманалда республикаялде гIемерал туристал рачIунел рукIиналъулги», — ян бицана Т. Беляевалъ.
Н. Павловасги абуна коронавирусалде данде ревакцинация гьабизе кколин анлъ-анлъ моцIидасан.
«Ревакцинация гьабизе бегьула «Спутник V» вакцинаялъ. Гьеб гьабуразе рес щола халкъазда гьоркьосеб сертификат щвезе ва квалквал гьечIого къватIисел пачалихъазде ине. СагIудиязул ГIарабиялде унезе гьабизе кколеб вакцинаялда гьоркьоб буго «Спутник V».
«Дагъистан» РИАялъул директор МухIамад МухIамадовас министралда ва бетIерав санитарияв тохтурасда цIехана гьанже баккараб «маймалакалъул тIадерахъи» абураб унти нилъер улкаялде бачIиналъул хIинкъи бугищилан. Павловас бицана къватIисел пачалихъазде хьвадизе ахираб заманалда рес гьечIелъул, гьеб унтудаса нилъ цIунун хутIизе бегьулин. Кин букIаниги, республикаялдаги хIадурлъи гьабулеб бугин къватIиса рачIине бегьулел унтабаздаса цIуниялъе.
«Маймалакалъул тIадерахъи» бигьаго бахунеб унти гуро. 30 улкаялда 900-ялдаса цIикIкIун чиясде бахунги буго гьеб. Гьезда гьоркьор лъимал ва руччаби цIакъго дагь гурони гьечIо. ГIемераб мехалъ аскIор цадахъ ругел гIадамазде гурони бахунебги гьечIо гьеб. Коронавирус гIадин балъго гуреб, гьеб унти букIин берда бихьула, тIомоде тIаде жо балелъул.
П. СУЛТIАНМУХIАМАДОВА
