Россиялъул церетIурал шагьаразецин мисалияб куцалда къачIалел руго магIарухъе унел нухал
ЛъикIаб тайпаялъул къачIарал нухал хIисабалда нилъер республикаялда ругел шагьранухал росун руго Россиялдаго бищунго лъикIал нухазул сияхIалде. Киналго тIалабазде дандекколел ва хъулухъ гьабун къачIарал нухазул 56 процент хIисабалде босун буго статистикаялъулаб цIех—рех гьабураз. Россиялда бищун лъикIал нухал ратун руго Москваялдаги, Ханты—Мансийскиялъул автономияб округалдаги. Нилъер республика буго сияхIалъул 16—абилеб бакIалда.
ГьечIеб жо тIаде жубан кьураб баян гьеб гурин бицана «Дагъавтодор» идараялъул пресс-хъулухъалъул вакилас.
— Нухал къачIаялде цIакъ кIудияб кIвар кьолеб буго республикаялда ахираб заманалда. 2019 соналда нижеца къачIана 500 километр нухлул. Гьединго реконструкциялъулал хIалтIаби гьаруна 150 км. шагьранухазе. Гьелъул магIна кколаро нижеца киса-кибего хъилги тIун нухал къачIанин абураб. Хъил тIуралги руго, тIечIел нухал ритIизарун, гIемераб хIалтIи гьабуна.
Гьединго гъоркьисаги исанаги нижеца кIвар кьуна цереккун къачIалаго рагIалде рахъинчIого хутIун рукIарал нухал лъугIизариялдеги. Нухал къачIаялда жаниб багьабазул оптимизация гьабиялъги, гIарцул сурсатазул суалги чIара-хьараб низамалде бачIиналъги рес кьуна гьел хIалтIаби рагIалде рахъинаризе, — ян бицана «Дагъавтодоралъул» пресс-хъулухъалъул вакил МухIамад Лабазановас.
Шоферзабазул рагIабазда рекъонги, цогидал регионазда данде ккуни, гIемерго узданал ва хъулухъ гьабурал нухал руго нилъер республикаялда. Мисалалъе, Россиялъул централда ругел шагьараздацин гIемер руго, цIадал хIалакиндал, сордо-къоялъ жаниса хьвадизе бегьуларедухъ лъугьунел нухал.
Нухазда хвезабулеб гIарцуда барахщугеги, хIукумат. ЦIакъ кири кIудияб иш бугелъул.
