Нухазул къурбаназул пашманаб сияхI
Авариял гIемерлъулел руго къо бахъанагIан. Машина цоцалъ тункичIебниги, чиясе къварилъи ккечIебги къо гьечIо республикаялда. ЦохIо гьаб араб анкьалда жаниб ичIго чи хун, 35-яв лъукъун больницаялде ккун вуго.
РакIгъанцIизабулеб авария ккана 25 июлалъул кватIараб сардилъ Хасавюрт районалда. 46 сон барав чияс бачунеб машина, нухлул гIорхъиги хвезабун дандречIчIана 25 барав чияс бачунеб цогидаб машинаялда. Амма иш гьелда къокълъичIо, гьевго талихIкъос речIчIана аскIосан унеб букIараб цоги автомобилалда. ГIайиб ккарав 46 сон баравги, гьесда цадахъ вукIаравги, гьел речIчIараб машина бачунев 25 сон баравги гьесулго гьалмагъги лъабабилеб машинаялда жанив вукIарав чиги гьеб бакIалдаго хвана. Жеги щугоги чи захIматаб хIалалда больницаялде хъамуна. Щуго жаназа. Щуго захIматго лъукъарал…
Цересел къояздаги, цо мехтарас машинаялъ мерхьун рехана къватIал лъухьулей йикIарай цIикIкIараб ригьалъул гIадан. Гьей гъаримги бакIалдаго хвана. Гьанже гьев чIухIухъан 12 моцIалъ туснахъ гьавун вуго суд гьабулеб къо щвезегIан.
Мехтарал гIоркьилаз гIумруялдаса ратIа гьаруразул сияхI гьитIинаб гьечIо. Исана маялда «цIани магIарде рахарав» цо лотияс бачунеб машина речIчIана цогиялда. Гьеб бакIалдаго хвана гьелъул шоферги мехтарасул машинаялда жанир рукIарал кIигоялги. Гьанже гьев судалда цеве эхетизе вуго.
Гьединго 27 июлалда Сергохъала районалда «Утамыш-Кичи- Гамри» шагьарнухда ккараб автоавариялда хвана цо чи. 32 сон барав гIолохъанчиясухъа машина речIчIана 60 сонил ригьалда вугев чиясда, гьев гьеб бакIалдаго къадаралде щвана.
Араб гьатIан къоялъ, Гъаякент районалда ккараб ДТПялдаги гIумруялдаса ватIалъана цо ва лъукъана лъабго чи.
ЛъагIалил байбихьудаса жакъа къоялде щвезегIан республикаялда ккун буго 625-ялдасаги цIикIкIун ДТП, 140-ялдаса цIикIкIун чи хун вуго, лъукъун больницаялде ккаразул къадар бахана 850-ялде.
Рулалда нахъа ругел гIолохъаби гьаглъун руго. ГIарцуца ратаниги, чIухIиялъ батаниги, гIаракъиялъ ратаниги. Гьединаб сурат нужедаги щибаб къоялъ гIадин бихьулеб батила. ЦIорода кьурди гьабулей ясалъ гIадин, чIараб бакIалда жиндаго тIад сверизабула машина, квешал гьаркьалги рахъинарун, хIуртIа босизе сверухълъиги гьабун. Живгоги вукIуна хъала бахъизе щвараб гIадин вохун. Цо цIекIал, гIадан жойиде гьавуларел гьаркьалги рахъинарула.
Квешаб гьаракьги бахъинабун кутакаб хелъиялда хъамун уна машина федералиял шагьранухдасан. Гьуридул хехлъиялда уна хъамун, кире гьел гIедегIулел, кида гьеб ццулъараб уммат кантIулеб?
РФялъул нухазда хIинкъи гьечIолъи чIезабиялъул хъулухъалъул республикаялда бугеб бутIаялъул нухмалъулев Александр Шалагин, араб соналъ кIиго нухалъниги дандчIвана Динияб идараялъул вакилзабигун. Нухазда гъалмагъир гьабулел гIолохъабазде вагIза-насихIаталъул хабар бицун гьел кантIизареян гьаригун. Муфти АхIмад-хIажи афандиясги (къ.с), доб соналъ муфтияталъул председательлъун ГIабдула-хIажи Салимовасги абун букIана доб мехалъ, мажгитазда имамзабазги, гьединго нижецаги гьеб тема гьоркьоб къотIизе толарин, гьелдаса хадубги вагIза-насихIаталъул калам цIикIкIинабизе бугин.
Амма насихIаталъухъ гIинтIамулеб гIелищха бугеб рулазда нахъа.