Юрий Чайка — Дагъистаналда

Гьал къоязда республикаялде вачIун вукIана Россиялъул президентасул Северияб Кавказалъу­л федералияб округалда вугев вакил Юрий Чайка. Дагъистаналъу­л хIукуматалъул минаялъув гьев дандчIвана республикаялъул жам­гIи­ял гIуцIабазул нухмалъулелгун. 
Президентасул вакиласе лъазе бокьун букIана Дагъистаналда ругел жамгIиял гIуцIабазул хIалтIи кин унеб бугебали, цIех-рех гьабуна республикаялда бугеб политикиябгун экономикияб ва жамгIияб ахIвал-хIалалъул, Россиялда кколел ругел политикиял лъугьа-бахъиназда тIасан дагъистаниязул бугеб пикруялъул.
 
Данделъиялда гIахьаллъарал республикаялъул жамгIиял гIуцIа­базул нухмалъулел Елена Павлюченкоца, Интизар Мамутаевалъ, Зикрула Ильясовас, ГIайшат ХIамзаевалъ ва МустIапа Билаловас загьир гьаруна республикаялда ва улкаялда кколел ругел хиса-басиязда тIасан жидерго пикраби. 
Юрий Чайкада церелъуна Да­гъистаналъул жамгIияталда,  ай Халкъияб Собраниялъул, бакIалъулал муниципалиял гIуцIабазул депу­татазда, хъулухъчагIазда гьоркьор руччабазул къадар дагьаб бу­кIи­налъул, инвалидазе гьабулеб гIей гьечIеб кумекалъул, Дагъистанал­да жамгIият цебетIеялъул хасаб программа гIуцIизе ккеялъул, ба­кIалъулал кадраби тIаса рищиялде, гьел хIалтIуде тIамиялде  кIвар кьезе ккеялъул суалал. 
 
ДандчIваялда хасаб пикру буссинабуна Дагъистаналъул мацIазул бугеб лъикIаб гуреб ахIвал-хIа­лал­деги. Хъизамалдасан, лъималазул ахаздасан байбихьун, школазде щвезегIан гьеб кIвар цIикIкIараб суалалде тIа­са-масагояб бербалагьи гьабулеб бу­кIиналъулги бицана гьениб.
Президентасул вакилас бицана цебеги республикаялъулгун жин­дирго букIараб бухьеналъул хIа­къалъулъ. Ва гьес рагIиги кьуна, цере лъурал суалазухъ рагIа-ра­кьанде щун халги гьабун, гьел тIу­раялде кIвар буссинабизе.