Налъи бецIизе буго дагь-дагьккун

«Газпром газораспределение Дагестан» ОООялъ кьезе бугеб гIарцул бицун данделъи тIобитIана хIукуматалъул председатель Артем Здуновас.

2018 соналъул тIоцебесеб июлалдаса 2019 соналъул 31 июлалде щвезегIан «Газпром газораспределение Дагестан» ОООялда хадуб бугеб 550 миллион гъуршил налъи бецIун бахъинабизе заман кьуна. Гьеб бецIизе буго бутIа-бутIаккун.
Газалъул мухъазул хIисабсуал гьабизе бугинги лъазабуна данделъиялда. Гьезул бащдазул вуго кIи-кIи бетIергьан – республикаги муниципалитеталги.
«Гьеб суал тIубазе ккола, щайгурелъул гьелда бараб буго
республикаялъе щолеб хайир»,
— ан абуна данделъиялда кIалъалаго республикаялъул вице-премьерасул ишал тIуралев ХIажимухIамад ХIусеновас.
«Газпром газораспределение Дагестан» ОООялъул баяназда рекъон, республикаялда буго 13000 километр газалъул мухъазул. Амма гьездаго гьоркьор руго жеги документал гьаричIелги мухъал. Гьединлъидал чара гьечIого гьеб суал роцIинабизе кколин лъазабуна хIукуматалъул нухмалъулес.