10 маялда республикаялъул нухмалъиялда букIараб данделъиялда бицана гIорхъолъа рорчIарал ахIвал-хIалалги цIа ккеялъул хIужабиги цереккунго нахъчIваялъул, гьединго нагагьлъун гьединал хIужаби ккани, гьезул заралалъул хIасил лъугIизабиялъе щиб гьабилебали.

  ГьанжегIагар Красноярск краялда цIадуца гьабураб заралги ккана гьеб данделъи тIобитIиялъе гIиллалъун. Гьороца добе-анибе цIаги босун, 60 росдае зарал ккун буго гьениб, анкьго чиги хун вуго.

  2010 соналдаса нахъе нилъер гьанир мугIрузул районаздаги 11 бакIалда ккана кIудиял цIаял. Гьелдалъун гIадамазе 700 миллион гъурщил заралги ккун буго.

Амма гьединал бакIазде цIа свинабизе унелъул мугIрул-щобал ругеб бакI букIиналъ, квал-квалги кколеб буго МЧСалъул кIуди-кIудияб техникаялъе. Гьедин ахирал соназда бакI-бакIалда гIуцIун буго цIа свинабулезул анцIго пост. Гьенир хIалтIула гIадатиял гIадамал.

 Гьединго санайилго гIорал къватIире кIанцIиялда хIинкъи букIуна Бабаюрт, Гъизляр, Хасавюрт, Гъизилюрт районазда. Гьелда бан Сулахъ, Терек, Самур гIоразда цIуна-къаялъул хIалтIаби гьарулел рукIиналъулги бицана данделъиялда.