ГIахьвахъ районалда бихьизабуна «ИчIго бахIарчи» абураб документалияб фильм. Гьелда бицунеб буго КIудияб ВатIанияб рагъда фашистазде данде бахIарчиго вагъарав МухIамадзагьид ГIабдулманаповасулги гьесда цадахъ вукIарав жеги микьго солдатасулги хIакъалъулъ.
Данделъиялда фильмалъул хIакъалъулъ бицана гьелъул режиссер, «Звезда» телеканалалъул продюсер Владимир Шуванниковас. ДРялъул мустахIикъав энергетик МухIамад Атуевасги РФялъул МИДалъул Дипломатияб академиялъул преподаватель, фильмалъул продюсер Елена Шуванниковалъги бицана гIолеб гIелалъе тарбия кьеялъе фильмалъул бугеб кIваралъул хIакъалъулъ.
КIаратIа росдал бегавул Х. ХIайбулаевас В. Шуванниковасе сайгъат гьабуна дипломги, КIаратIа росдал хIурматияв гражданинасул свидетельствоги, «КIаратIа: аралдаса букIинеселде» абураб энциклопедияги.
Данделъиялде вачIун вукIарав ДРялъул Краеведениялъулгун туризмалъул централъул нухмалъулев Арсен ХIайбулаевас В. Шуванниковасеги, Денга Махиевасеги, МухIамадзагьид ГIабдулманаповасеги (Совет Союзалъул БахIарчиясул ирсилав) сайгъат гьаруна республикаялъулаб ТОКСалъул юбилеялъулал медалал.
21 маялда «Звезда» телеканалалда бихьизабизе буго «ИчIго бахIарчи» абураб документалияб фильм.
ГIахьвахъ райадминистрациялъул пресс-хъулухъ
