Шамил районалъул Гьоор росдал гIадамаз интернеталдасан хитIаб гьабуна ДРялъул бетIер Сергей Меликовасдеги хIукуматалъул нухмалъулев ГIабдулмуслим ГIабдулмуслимовасдеги.
Гьез тIибитIизабураб видеоялда бихьулеб буго росдал гIадамазул кIудияб къокъаги гьезда цеве вахъун кIалъалев чиги.
Гьесул рагIабазда рекъон, гьаадерил рахIатхвей буго гьекъолеб лъеда хурхараб. Федералияб бюджеталдаса 44 миллионалдаса цIикIкIараб гъурущги биччан, 2013 соналда байбихьун букIун буго росулъе лъим бачине. 2018 соналда ахиралде щвезе кколеб букIараб гьеб хIалтIи жеги лъугIун гьечIо. Гьеб тIадкъан букIун буго «Дагсельхозстроялда» (подрядчик – ООО «Промстрой-2»).
«Дагьалъ цебе нижеца хитIаб гьабун букIана Россиялъул ЦIех-рехалъул комитеталъул Дагъистаналда бугеб управлениялде. Гьениса жаваб кьуна гьелда хурхун жидеца цIех-рех гьабулеб бугилан. БукIаниги, ниж, жамагIат, гьабилеб жо лъаларого руго. Гьале гьабсагIаталда гьаниб мажгиталда цебе бахъун чIун бугеб жамагIаталъ 2011 соналда 1,5 млн гъурущ бакIарун букIана росулъе лъим бачине. «Дагсельхозстроялъ» гьеб мехалда бачараб лъел рогIороги жагъаллъун, биххун бачIун буго», — ян бицунеб буго гьаадерил жамагIаталда цевеги вахъун, видеоялдасан кIалъалев чияс.
Гьелда бан ДРялъул БакIал раялъул министерствоялъ гьабураб лъазабиялда абулеб буго «Дагсельхозстроялъул» баяназда рекъон, «Промстрой-2» ОООялъ гIезегIан гъалатIал риччан ругила лъел рогIоро лъолаго.
2019 соналъул июналда комиссиялъ тIатинабун буго гьеб рогIоро унел цо-цо бакIал букIине кколеб гъварилъиялда рухъун ратичIолъи, резервуарал руцIцIулел рукIин, кIиго бакIалдасан рогIоро чIинтIун букIин, лъим бачIунеб бакI сверун къачIолъи, лъел гъуялда тIад лъолел тIалъелал маххул гурел, пластмассалъул рукIин.
Заказчиказул тIалабалда рекъон, гьениб хIалтIи цIидасан байбихьунги букIун буго. Амма гIураб къадаралда гIарац гьечIилан багьанабиги ратун, подрядчиказ гьеб рагIалде бахъинабун гьечIо.
Гьединго ДРялъул БакIал раялъул министерствоялъ баян гьабухъе, Гьоорибе лъим бачиналда хурхун лъугьараб ахIвал-хIал рукIалиде бачине кколеблъи бичIчIизабун букIун буго исана соналъул байбихьуда «Дагсельхозстроялъул» нухмалъиялда вукIарав МутIалип МутIалиповасдаги.
Министерствоялъул баяназда рекъон, гьениб гьабичIого хутIун буго 6,1 млн гъурщиде хIалтIи. Гьелдаса разилъи гьечIолъиги бихьизабун, хIалтIи хадуб бехъерхъизабуралъухъ тIаде бачIунеб пеняялъул 3,5 млн гъурущги кьезе кколин абураб кагъат битIун буго «Промстрой — 2» ОООялде. Гьелдаго цадахъ хIадурулеб буго судалде битIулеб гIарзаги.
