Хундерие бацIцIадаб лъим щвела

 

 

  Исана май моцIалъул ахиралда Хунзахъ хIалтIизе биччазе буго гьекъолеб лъим бацIцIад гьабулеб станция. Гьедин хъвалеб буго Россиялъул Минстроялъул официалияб сайталда.

Гьанже заманалъул материалги хIалтIизабун, цIакъ мухIканго рогIралги цогидаб къайи-цIаги лъун, 26,8 млн гъурущги тIад харж гьабун гIумруялде бахъинабураб федералияб проект («Чистая вода») ккола гьеб. Сордо-къоялда жаниб лъел 1296 кубометр яги секундалда жаниб 15 литр бацIцIад гьабула гьеб станциялъ.

Гьелдалъун анкьазаргоялде гIагарун чиясе бацIцIад гьабураб лъим щвезе рес буго.

Хунзахъа гIадамаз бицухъе, станция бан буго Байикьехун унеб нухда. Гьелъие кьучI лъуралдаса гIезегIан соналги ун руго.

Зульфия ХIажиева