Дагъистаналъулги руго лъикIал ресал

 

    ГIунги тIокIаб къадаралда хIадурула Россиялда нахги чакарги, гьединлъидал базаралда гьел нигIматал къанагIалъизе ресго гьечIо.

   Гьедин лъазабуна ДРялъул росдал магIишаталъулгун кванил нигIматазул министрасул тIоцевесев заместитель Шарип Шариповас.

   — Россиялда санайил хIадурула семечкадул нахул анлъгогIанасеб тонна, амма хIалтIизабула гIицIго кIиго млн тонна. Ункъо млн тонна тIокIлъулаан ва гьелъул пуланаб бутIа битIулаан къватIисел улкабазде бичизе. ЛъагIалида жа- ниб нилъер улкаялда хIадурула щуго млн тоннагун анкьнусго центнер чакаралъул ва нилъецаго хIалтIизабула – щуго миллионгун анлънусго тонна, – ян бицана гьес.

   Гьесул баяназда рекъон, нилъеца хIалтIизарулел аслиял кванил нигIматал гIезарула нилъерго улкаялда. КIиабилеб лъагIел буго, къватIисел улкабаздаса росулелдаса гьенире ричулел нигIматазул къадар цIикIкIиналдаса нахъе. Масала, 2021 соналде Россиялъул экспорталъухъ харж гьабуна 36 миллиардгIанасеб доллар ва импорталъухъ щвана 34 миллиардгIанасеб доллар. Гьединлъидал кинабгIаги хIажалъи гьечIо кванил нигIматазул нахърател гьабизе. Гьел камун нилъ хутIиларо. ГьабсагIаталда квекIенлъун кколеб буго нигIматал тукабахъе щвезариялъулъ, ай тIубазе ккола логистияб масъала.

   «Улкаялда дагьаб хIалкъай букIине рес буго росдал магIишаталъе хIажалъулел хьоназул рахъалъ. Гьеб рахъалъги гьабулеб буго хIалтIи – рекьизе къваригIунеб къадаралда хьонал нилъерго улкаялда гIезариялъул мурадалда. ГIадамазда бичIчIизабизе ккола: хIалуцараб ахIвалхIал гьечIо ва кванил нигIматазул базаралда ахIи-хIур гьабизе кколаро», — ян абуна Ш. Шариповас.

    Росдал магIишаталъул нигIматал гIезариялъе Дагъистаналда лъикIал ресалги шартIалги ругинги абуна гьес.