ДРялъул Халкъияб Собраниялъул комитеталда тIобитIараб данделъиялда гьоркьоб лъун букIана старостабазул хIакъалъулъ бахъараб республикаялъул законалъул проект («Об отдельных вопросах деятельности сельских старост в Республике Дагестан»).
Старостаясул хъулухъ Россиялъул цогидал регионазда билълъанхъизабулелдаса гIезегIан сонал ругониги, республикаялда гьелъул хIакъалъулъ бицине байбихьана росабазул администрациял къаялда хурхун закон къабул гьабизе лъугьиндал. Администрациялги къан, территориалиял отделал гIуцIарал росабалъ власталдаги халкъалдаги гьоркьов тезе хасав чи хIисабалда, староста тезе ккеялъул буго бицен.
Парламенталъул комитеталъул председатель Артур Исрапиловас нухда бачараб данделъиялда гIахьаллъана гIалимзабиги, жамгIиял хIаракатчагIиги, журналисталги. Проекталда тIасан жидерго пикраби загьир гьаруна тарихиял гIелмабазул доктор ГIабдулкъадир ГIумаровас, гражданияб жамгIият цебетIезабиялъул рахъалъ ДРялъул бетIерасда цебе гIуцIараб советалъул председатель Зикрула Ильясовас, юридикиял гIелмабазул кандидат Шарапудин Рашидовас, ДГУялъул кафедраялъул доцент, юридикиял гIелмабазул кандидат Заира Мусалаевалъ ва цогидаз.
Масала, гьениб аслияб бахIс ккана Дагъистаналъул шартIазда старостаясул хъулухъалда цIар кинаб телеб абураб суалалда тIасан. З. Ильясовас абуна федералияб законалъ рес кьун бугин гьеб хъулухъалда цIар щибаб субъекталъ жидеего бокьухъе лъезе, гьединлъидал щибаб росулъ гIадатлъун билълъухъе абизе бегьилин бегавул, юзбаши, къади, росдал гIел ва гь. ц.
Рехсараб законалъул проекталда хъвавухъе, старостаясе кьезе буго хасаб удостоверение. Гьединго материалияб рахъалъ гьесие гьарулел цо-цо бигьалъаби рарал рукIина бакIалъул администрациялъ къабул гьабулеб уставалда.
Цебеккун абуни бицен букIана староста чIового хIалтIизавизе рагIулин абун.
Старостаясул хъулухъалде кандидатура лъола пуланав чияс жинцаго, яги гьев вихьизавула муниципалияб гIуцIиялъ, ялъуни анцIгоялдаса дагь гьечIеб къадаралъул гIадамаз.
Старостабилъун тезе бегьуларо пачалихъияб, гражданиябгун пачалихъияб, гьединго муниципалияб хъулухъазда ругел ва тамихIалде цIарал чагIи.
