Исана маялъул ахиралда улкаялдаго тIаса вищарав 300 бизнесчи вачIине вуго МахIачхъалаялде. Гьениб форумги тIобитIун, нахъисеб къоялъ гьел щвезе руго бищун гIемер туристал рачIунел бакIазде.
«Эквиум» бизнес-цолъиялъ «Реальный бизнес: инструкция по выживанию» абураб форум тIобитIиялдалъун гьезда малъизе буго жакъа гIадал шартIазда бизнес кин нухда бачине бегьулебали, кризисалда данде кин къеркьезе кколебали, захIматаб ахIвал-хIалалде ккедал, рихха-хочунгутIиялъе сунца кумек гьабулебали.
Гьединал тадбирал «Эквиумалъ» гьаризе руго миллион чияс гIумру гьабулел шагьаразда. МахIачхъала ккола гьелъие гIоло тIаса бищараб тIоцебесеб шагьар.
