Коронавирусалъул хIакъалъулъ кино

 

     21 маялда «Россия — моя история» музеялда бихьизабуна «Первая крепость» абураб фильм. Гьеб ккола араб соналъ пандемиялда данде «красная зонаялда» къеркьолел рукIарал тохтурзабазул хIакъалъулъ республикаялда бахъараб тIоцебесеб документалияб кино.

 

       Фильмалъул режиссёр ккола Даниил Черногорцев. Гьединго гьелда гъорлъ гIахьаллъи гьабуна нилъер республикаялдаса журналист Исрафил Исрафиловасги.

  ГIемерав чи вачIун вукIана гьеб къоялъ «Россия — моя история» музеялъул залалде. Киналго сихIкъотIун балагьун рукIана сценаялда рекъезабураб кIудияб экраналдаса кIалъалел тохтурзабазухъ. Аслияб къагIидаялъ гьел рукIана МахIачхъалаялъул тIоцебесеб больницаялъул хIалтIухъаби ва гьелъул нухмалъулев ХIажимурад Маллаев. Сабураб, гIодобе биччараб гьаракьалъ бицунеб букIана гьез араб соналъ жидедаго бихьараб захIматалъул хIакъалъулъ.

    Гьеб киналъго кIудияб асар гьабуна залалда рукIарал гIадамазеги. Киноги лъугIун къватIире унел гьез цоцазда абулеб букIана, битIараб бицани, байбихьудаго къватIире тIуризе хIалакун букIанила ракI. Сценаялда унтуца гIажиз гьарурал гIадамазухъги балагьун, гъоркьиса гьеб гIузруялъ бусаде ккезарун хадуб жидедагоги букIараб хIалги цебечIун, захIмат букIанин магIу кквезеян.

А. Юсупов