Республикаялъул хIукуматалъ рахъккуна Каспийскиялъе «Город трудовой доблести» абураб цIар кьезе шагьаралъул нухмалъиялъ загьир гьабураб пикруялъул.
ХIукуматалъул нухмалъулев ГIабдулмуслим ГIабдулмуслимовас гьеб пикру дандбана Сергей Меликовасулгун. ЦIакъ лъикIаб пикру бугилан, гьесги рагIи кьуна гьеб суал улкаялъул президент Владимир Путинилгун дандбазе.
БитIараб бицани, гьединаб цIар щвезе мустахIикъаб шагьар буго Каспийск. «Дагдизель» завод гучалда букIарал 1970-1980-абилел соназда 40 000 чи хIалтIулаан гьенив.
ТIубараб шагьарго гьениб жаниб хIебтIун букIанин абуни, мекъи ккеларо. Гьединаб захIматалде ругьунаб халкъги бугеб бахIарчияб шагьар ккола Каспийск. Биччанте гьелъие хIурматияб цIарги щвезе.
Ашахан Юсупов
