Нухазда тадбир гьечIо, гIолохъабиги гьаглъун руго

 

24 ноябралда ДРялъул хIукуматалъул минаялъуб тIобитIараб данделъиялда бицун букIана республикаялъул шагьранухазда гьечIеб лъикIаб хIалалъул хIакъалъулъ. Масала, 10 моцIида жаниб 1145 авария ккун буго республикаялда. Хун вуго 247 чи, лъукъун больницаялде ккара­зул къадар бахун буго 1606 чиясде.

    Гьединаб талихIкъосараб хIал республикаял­да батани, гьелда бан гьабулеб хIалтIи цIакъго тIаса-масагояб букIин бихьулеб бугин абуна данделъиялда гIахьаллъи гьабурав республика­ялъул бетIер Сергей Меликовас.

  — Бищун аслияб гIиллалъунги бихьулеб буго жинца гьабураб такъсиралъухъ тамихI букIине гьечIеблъиялда машина бачунесул ракIчIун букIин. Гьединал чагIи сабаблъун холел руго гIемерал гIадамал, гIумруялъго сакъатлъун хутIулел руго жеги цIикIкIун. ЦIакъ пашма­наб сурат буго. Нухда гIадлу-низам хвезабурав гIолохъанчи ватаниги, ригьалде вахарав ватани­ги, гьесда лъазе ккола жаваб кьезе букIин, — илан абуна бетIерас. Гьелда тIад ракIунтун хIалтIизе ахIана гьес низам цIунулелги.

      Араб анкьалда тIолабго улкаялдаго рагIараб иш ккана Москваялъул Кутузовасул цIаралда бугеб проспекталда. Кутакаб хехлъиялда бачIунеб BMW маркаялъул машина речIчIана жеги кIиго автомобилалда. ХIасилалда BMWялъув вукIарав кIигояв хвана. Гьезул цояв ккола рулалда нахъа вукIарав СагIид Губден­ский. Автомобилазул темаялда социалиял гьи­наздасан гIемер цеве вахъунев блогер вукIана гьев. Социалиял гьиназда цIакъ машгьурлъун­ги букIана гьесул цIар. Цадахъ вукIарав гьесул гьудул, Дагъистаналъул автомобилистазул ва мотоциклистазул ассоциациялъул нухмалъулев Заур Ибрагьимов больницаялда хвана.

      Социалиял гьиназда хъвалеб букIана СагIид Губденскияс жиндирго цо видеороликалдасан гIолилазде хитIаб гьабулеб букIанин нужеца машинаби хъамугейин абун…

   ЦерегIан къоязда Дагъистаналдаги ккана вахIшияб авария. Шамхал-Термен поселокалда аскIоб, «Приора» автомобиль речIчIана бето­налъул хIоболъ. Гьенир жанир рукIаразул цояв хвана, цогидал захIматаб хIалалда больницаял­де ккана.