Щибаб соналъул 21 октябралда кIодо гьабула Дагъистаналъул мацIазул ва маданияталъул къо. Гьелда хурхун тIоритIула батIи-батIиял тадбирал, дандеруссинал. ЛъикIаб гIадатлъун лъугьун буго, щибаб соналъ, гьеб байрамалда хурхун Дагъистаналъул мацIазда гIаммаб диктант хъвазе данделъиги. Исанаги хъвана диктант гIемерисел школазда ва цIалул идарабазда. Ас- лияб диктант хъвалел бакIаллъун рукIана ДГПУялъул Дагъистаналъул филологиялъул факультет ва ДГУялъул филологияб факультеталъул Дагъистаналъулгун гIурус отделение.

Диктант тIобитIиялъул ва хъваялъул мурад ккола рахьдал мацIалъул лъай борцин ва рахьдал мацI лъаялъул бугеб кIвар бичIчIизаби. Исана диктант хъваялъе текст бо- сун букIана Расул ХIамзатовасул «Дир Дагъистан» асаралдаса.

— Исанаги диктант хъвай ана тIадегIанаб даражаялда, хIатта бакI гIечIого, кIиго аудиториялде рикьизе ккана. Авар мацIалда хъвалеб диктанталда гIахьаллъи гьабуна 50-ялдасаги цIикIкIун чияс. Гьезда гьоркьор рукIана ДГУялъул батIи-батIиял факультетаздаса, РПАялдаса, ДГУНХялдаса студентал ва преподавателал. Исана диктанталъул гIахьалчагIаз рихьи- заруна лъикIал хIасилал: бащдазда- саги цIикIкIун гIахьалчагIаз лъикIаб къиматалда хъвана хIалтIаби, — ян бицана ДГУялъул Дагъистаналъул мацIазул факультеталъул доцент Раисат Магьдиловалъ.

ДГПУялъул Дагъистаналъул филологиялъул факультеталдаги, санайилго гIадин, исанаги рахьдал мацIалда диктант хъвазе рачIана Дагъистаналъул миллияб политикаялъул ва диниял ишазул министр Энрик Муслимов, батIи-батIиял идарабаздаса вакилзаби, мугIалимзаби ва студентал. Диктант цIалана ДГПУялъул Дагъистанлъул мацIазул доцент, гIалимчи МухIамад НурмухIамадовас.

 

МухIамад МАНАПОВ