Хасел щолеб буго,хинлъи бокьун буго

 

   Хасалоялде республика хIадурго бугищ-гьечIищали абураб суал гьоркьоб лъураб данделъи тIобитIана Сергей Меликовас 21 сентябралда. Гьелъие гIоло гIуцIараб хасаб комиссиялъул вакилзабиги ракIарун, гIатIидаб данделъи букIана ХIукуматалъул минаялъуб.

  Муниципалиял идарабаз кьурал хIисабкьеялъул баяназда рекъон, хасалиде нилъ хIадурун ругин 89 проценталъин абуна республикаялъул бетIерас.

­  Гъоркьиса, дида ракIалда буго, ракьхасало чанги чи цIорон холел хутIана, рокъоса хинлъиги тIагIун.

Исанаги гьединаб ракIбакъвай гIадамазе щвечIого букIине, цебеккунго дирго бербалагьиялде гъор- кье босана дица гьеб суал, ­ ан абуна С. Меликовас.

 – Мисалалъе, хасел тIаде щведал ракIалдаго гьечIел гIунгутIаби ккола цо­цо бакIазда. 1 ноябралдехун кинабго хIадурун букIине ккола, кьиндал гIадамал хинлъиги тIагIун хутIичIого рукIине, ­ ян абуна гьес хадубги.

  Меликовас бицана «ПАО «Россети Северный Кавказ» гIуцIиялъул Дагъистаналда бугеб «Дагэнерго» филиалалъ 891 миллион гъурщиде хIалтIаби байбихьун ругин хасалоде муниципалитетал хIадурго рукIине. Кинабниги 35 районалда гьабулеб буго гьеб хIалтIи «Даг­энергоялъ».

  Гьединго нилъер республикаялда буго коммуналиял хъулухъазул идараби хасалоде хIадурлъиялъул рахъалъ гIуцIараб хасаб штабги.

   Гьелъ гьабураб хIалтIул хIисаб кьуна ДРялъул ХIукуматалъул нухмалъулев ГIабдулпатахI ГIамирхановас.

   Гьес бицана цIорораб заманалда гьоркьоса къотIичIого хинлъи кьолеб хIалалъ хIалтIулел рукIинелъун, киналго котельныял къачIазе 105 миллион гъурущ биччанин батIи-­батIиял шагьаразеян.

Мисалалъе босани, гьеб гIарац щун буго Гъизилюрт, ДагОгни, Хасавюрт ва Каспийск шагьаразе.

Гьединлъидал, 100 проценталъ гьечIониги, 89 проценталъгIаги республика хIадурго буго хасало нилъеда цIорой хъвачIого кьин нухда тIамизе. Гьанже гьеб 11 проценталъ ракIбекизабилареб батила нужерги. ЦIакъго хIалккани, гьоркьо­гьоркьобгIаги магIарухъеги раккизе бегьула. Доба боркьараб печрукъги, коронибе бараб картошкаги, кьиндалил халатал сардаз бицунеб аваданаб хабарги букIина. Воре, цIорозе чIоге.