Октябралъ вищизе вуго Меликов

 

   Депутатазул цIияб корпусалъ цIар чIвазе буго республикаялъул бетIерасда

   Республикаялъул цIияб парламент гIуцIун хадуб, 14 октябралда депутатаз вищизе вуго ДРялъул цIияв нухмалъулев. Халкъияб Собраниялъ гьоркьоб лъезе букIине лъабго чиясул кандидатура бихьизабун буго президент Владимир Путиница. Гьел ккола гьабсагIат республикаялъул нухмалъулесул ишал тIуралев Сергей Меликовги, парламенталъул вице-спикер Камил Давдиевги ва ДРялъул Рищиязул комитеталъул член Самир ГIабдулхаликъовги.

   Гьев лъабасулго цоясда депутатаз цIар чIвазе бугеблъи хIакъаб бугин бицана «Дагъистаналъул гIолилал» газеталъул бетIерав редактор, публицист Рамазан Ражабовас. ­ Республикаялъул бетIерлъиялде рихьизарурал кандидатурабазул цIарал Путинихъе ритIула регионалияб парламенталъул партияз.

   Гьединаб буго законалъул къагIида. «Единая Россиялъ» вихьизавуна Сергей Меликов, «Справедливая Россия» партиялъ цIар чIвана Камил Давдиевасда, коммунистаз вакил гьавуна Самир ГIабдулхаликъов.

    Гьениб ургъизе яги щакдаризе хутIараб жоцин гьечIо. Рищиязда бищун цIикIкIун гьаркьал щвараб «Единая Россия» партиялъул депутатаз Меликов вищизе вукIин хIакъаб жо буго. Гьединлъидал щибго щаклъи гьечIо Меликов республикаялъул бетIерлъун тасдикъ гьавизе вукIиналда, ­ ян бицана Р. Ражабовас.

   Гьединго Сергей Меликовас РФялъул Федерациялъул Советалде битIун буго нилъер республикаялъул рахъалдаса сенаторлъун вукIине вугев лъабго чиясул кандидатураги. Гьел ккола Ильяс ГIумаханов, республикаялъул Росдал магIишаталъул университеталъул ректор Зайдин Жамбулатов, Халкъияб Собраниялъул вице­-спикер Елена Ельникова. ­ Сенаторлъун Ильяс ГIумаханов вищизе вукIиналдаги лъилго щак­лъи батиларин ккола. Гьев ву­го политикаялъулаб аренаял­да цевегоялдаcа нахъе вугев, хIалбихьи бугев чи. Федерациялъул Советалъул нухмалъулей Валентина Матвиенкол заместительлъун вукIарав чи хIисабалдаги цIикIкIун ресал руго гьесул сенаторлъун вачIине, ­ ян рикIкIунеб буго «Дагъистаналъул гIолилал» газеталъул редакторас.