МагIарул автономиялъул цIияв нухмалъулев – Айтемир Сатираев

 

    15 апрелалда ДРялъул Миллияб политикаялъулгун диниял ишазул министерствоялда тIобитIана магIарулазул миллиябгун маданияб автономиялъул данделъи.

    Гьенив вищана автономиялъул цIияв нухмалъулев – республикаялъул Халкъияб Собраниялъул депутатлъунги вукIарав Казбек районалдаса бизнесчи Айтемир Сатираев.

     Гьелде щвезегIан гьеб хъулухъалда вукIана филологиял гIелмабазул доктор, профессор Ибрагьимил МухIамад.

    Автономиялда сверухъ цолъарал миллатцоязе баркалаги загьир гьабун, гIелмияб хIалтIуе квекIен ккезехъин бугиланги абун, нахъе кьуна гьес гьеб жамгIияб хIалтIи.

    ТIадежоялъе дагьалъ цебегIан Хъвадарухъабазул союзалъ МухIамадида тIадкъана авар секциялъе нухмалъи гьабиялъул ишги.

     МагIарулазул цевехъан, автономиялъул тIоцевесев нухмалъулев Сайгидпаша ГIумахановас бицана гьанжеялдаса хадуб автономия федералияб ва халкъазда гьоркьосеб даражаялде бачине бугилан. Гьелъул мурадги кколила Россиялъул регионазда ва къватIисел улкабазда ругел магIарулал цолъизари, рахьдал мацIгун маданият цIуниялъе, тарих бечед гьабиялъе хIалтIи гIуцIи.

    С. ГIумахановасул жамгIияв кумекчи Шамхалдибир ГIисаевас тIаде жубана автономиялъул хIалтIи цIилъизабиялъе гIоло гьелъул вакилзабаз кватIичIого чанго данделъиги тадбирги   тIобитIизе бугинги.

  З. ХIАЖИЕВА