26 июлалда Дагъистаналъул бетIер Сергей Меликовас шапакъатал кьуна батIи-батIияб махщалилъ тIокIлъи бихьизабурал дагъистаниязе. Масала, гьезда гьоркьор руго росдал магIишаталъул, экономикаялъул, медицинаялъул, спорталъул, культураялъул хIалтIухъаби, гIалимзаби, гьединго, ДРялъул Пачалихъиял ва ХIамзатил Расулил премиязе мустахIикълъарал журналистал, шагIирзаби ва цогидалги.
«Тайная тетрадь» абураб публицистикаялъул тIехьалъухъ Пачалихъияб премия щвана «Дагъистан» журналалъул бетIерав редактор, журналист МухIамад БисавгIалиевасе. Гьес абуна цересел соназда комиссиялда гъорлъе щаклъи кколел чагIиги журан, гьеб премиялъул къимат хвезабун букIанин, амма исана гьелъулъ ритIухълъи чIезабунин абун. Гьединлъидал, БисавгIалиевасул пикруялда рекъон, гьединаб бербалагьиялъ тIалъиялдехун халкъалъул божилъи бижизабула.
«Дербентское ковроткачество» абураб монографиялъухъ премия кьуна этнограф, тарихиял гIелмабазул доктор МухIамадхан МухIамадхановасе.
Пачалихъияб премия щвана кинавниги 14 чиясе. Гьелъухъ гьезие республикаялъул боджеталдасан биччараб гIарцул гIаммаб къадар бахуна 4,5 млн гъурщиде.
«ГьацIул иццал» абураб кучIдузул тIехьалъухъ Расул ХIамзатовасул премиялъе мустахIикълъана шагIир ТубхIат Зургьалова. Гьелъ абуна Россиялда 2023 сон Р. ХIамзатовасул сонлъун лъазабун букIиналъги цIакъго асар гьабунила жиндие гьеб премиялъ. ТIадежоялъе, «Рохалил министерствоянги» абулаан Расулица ТубхIатида. Гьединго гьес гьелъие хъван рукIана гьадинал мухъалги:
БацIада – музыка, ЦIада — рагIаби,
РагIулеб букIана ТубхIат лъазегIан.
Гьанже бацIадерил руго рагIаби,
РагIулареб кинаб ЦIада музыка?
Меликовас шапакъатал кьурал машгьурал дагъистаниязда гьоркьов вукIана «КЭМЗалъул» генералияв директор Ибрагьим АхIматIовги. Гьесие кьуна «Дагъистан Республика социалиябгун экономикияб рахъалъ цебетIезабиялъе гIоло» абураб медаль.
Республикаялъул бетIерас «Дагъистан Республикаялда цебе гьабураб хъулухъалъе гIоло» абураб орден кьуна Россиялъул Пенсиязул фондалъул ДРялда бугеб отделениялъул нухмалъулев МухIамад ГIисаевасе.
Гьебго орден щвана гIалимчи-зоотехник, ДРялда бугеб федералияб аграриябгун гIелмияб централъул отделалъул заведующий ГIабдусалам ХIожокIовасеги.
«ХIакъикъат» газеталъ ракI-ракIалъ баркула киназдаго гьезие щварал тIадегIанал шапакъатал. Гьарула хадубккунги сундулъго икъбал.
