С. Кусова: «Солдатасул шинель ретIарав генерал»

1 февралалда Москваялда кIодо гьабуна ГIали Камаловасул юбилей

 

ТIоцебесеб февралалда Москваялда Журналистазул рокъоб, кIодо гьабуна «ХIакъикъат» газеталъул бетIерав редактор, Дагъистаналъул Журналистазул союзалъул председатель ва Россиялъул Журналистазул союзалъул секретарь ГIали Камаловасул 70-сонилаб юбилей.
Гьеб тадбир гIуцIун букIана Россиялъул Журналистазул союзалъул, Централияб федералияб округалда бугеб Дагъистаналъул Дармил вакиллъиялъул, РФялъул президентасда цебе бугеб ДРялъул хIукуматалъул вакиллъиялъул ва Россиялъул Халкъазул ассамблеялъул Дагъистаналъул регионалияб отделениялъул хIаракаталдалъун.
Юбилярасда баркигун кIалъазе рахъана Пачалихъияб Думаялъул информациялъул политикаялъул, информациялъул технологиязул ва бухьеназул комитеталъул председатель, Россиялъул Журналистазул союзалъул секретарь Леонид Левин, РФялъул президентасул гIакълучи, РФялъул президентасда цебе бугеб инсанасул ихтиярал цIуниялъул ва жамгIият цебетIеялъул советалъул председатель, Россиялъул Журналистазул союзалъул секретарь Михаил Федотов, Россиялъул Журналистазул союзалъул председатель Владимир Соловьев, Россиялъул Журналистазул союзалъул хIураматияв председатель Всеволод Богданов, Каспий регионалда ругел улкабазулгун экономикаялъул ва гуманитариял гьоркьорлъабазул Россиялъул президентасул хасав вакил Рамазан ГIабдулатIипов, РФялъул президентасда цебе бугеб ДРялъул хIукуматалъул вакиллъиялъул нухмалъулей Изумруд МухIутдинова, Централияб федералияб округалда бугеб Дагъистаналъул Дармил вакиллъиялъул нухмалъулев МухIамад Сайгидов ва цогидалги. Гьанибго абилин, юбилярасул адресалда бачIана Дагъистаналъул бетIерасул ишал тIуралев Владимир Васильевасул баркиялъулаб телеграммаги.
Данделъиялда юбилярасе кьуна гIемерал шапакъатал ва сайгъатал, гьезда гьоркьоб букIана Пачалихъияб Думаялъул рахъалъан ХIурматалъул грамотаги.
Данделъиялдаса хадуб «Россия – киназего» абулеб интернет-порталалъул мухбиралъ гара-чIвари гьабуна Россиялъул Журналистазул союзалда цебе гIуцIараб СМИяздасан рорхулел миллиялгун диниял масъалабазул централъул нухмалъулей Сулиета Кусовалъулгун.
«ГIали ккола солдатасул шинель ретIарав генерал. Гьес тараб захIматаб нух тезе, гьес хIехьараб хIехьезе – бигьаяб иш гуро. Бигьаяб иш гуро — гулбузул ва кьвагьиялъул гьаркьихъе хIалтIизе. РахIат толеб гьечIо гьесул ракIалъе журналистал чIваялъул хIужабаз. Къокъабго заманалда жаниб свана 19 журналистасул гIумру. ГIакълу цIубарал журналистал чIвана республикаялда – гьелъги бицуна республикаялда бугеб рагIул багьа. МагIна гъваридаб рагIул багьаялъул къимат лъала Камаловасда, гьес кидаго рахъккола битIараб рагIи абизе нахъе къаларесул. Гьединал гIадамал къваригIун руго жакъа.
РакIбацIцIалъи ва журналистасул рагIуе ритIухълъи – гьеб хираго чIана Дагъистаналъе – гьебго бихьулеб буго дида Камаловасулъги. Гьев ккола политикги, жамгIияв хIаракатчиги, сугъулдерил жамагIаталъул гIада­тияв чиги. Гьес кинабго хIалтIи гьабула гIакъилав пачалихъияв инсанас гIадин.
Абизе ккола, нилъеца гIицIго гьа­вураб къо гуро кIодо гьабулеб букIараб ГIалил, жакъа Москваялда кIодо гьабулеб букIана политикияв хIаракатчиясул ва Дагъистаналъул вакиласул юбилей. Жакъасеб данделъиялъ бихьизабуна регионаздаса журналистал цере рукIин федералиял журналистаздаса. Щайин абуни, Кавказалъул журналистал руго халкъалде гIагарал, гьезулъ цIикIкIун буго ракIбацIцIалъи. БатIалъи гьечIо — журналистал, гIалимзаби, политикал – киналго цо федералияб майданалде данделъичIони, нилъер улкаялда вацлъиялъулаб миллияб политика букIине гьечIо.
Нилъ гьабсагIат рикь-рикьун руго, нилъер гьоркьорлъаби кьватIелазул цIун руго. ГIали гIадал гIадамаз кIудияб хIаракат бахъулеб буго гьел кьватIелал седезе, миллатазда гьоркьоб гьуинлъи бекьизе. Гьаб данделъиялъги бихьизабулеб буго Россиялъул рес букIин унго-унголъунги гъункараб улкалъун лъугьине. Гьелъие гьодорал гурел, ГIали гIадал камилал, кьучIал гIадамал хIажат руго», — ян абуна гьелъ.
Официалияб бутIаялдаса хадур ахIана магIарул кучIдул, рихьизаруна миллиял кьурдаби.
ПатIимат Расулова,
«Россия – киназего» абураб интернет-порталалъул мухбир