Гьалбадерие санагIатал шартIал гIуцIизе руго
Исана апрель-маялда Каспийскалда тIобитIизе буго спортивияб гугариялъул рахъалъ Еропаялъул чемпионат
Дагъистаналъул бетIерасул ишал тIуралев Владимир Васильев дандчIвана «Россиялъул спортивияб гугариялъул федерация» абураб ТIолгороссиялъул жамгIияб гIуцIиялъул президент Михаил Мамиашвилигун ва «Гугариялъул цолъизабураб дунял — Европа» абураб халкъазда гьоркьосеб федерациялъул вице-президент Георгий Брюсовгун.
Гьез бицана чемпионаталде хIадурлъи гьабулеб бугеб куцалъул. Аслияб кIварбуссинабуна логистикаялъул суалаздеги турниралъул гIахьалчагIазул гIумруялъе хIинкъигьечIолъи букIинабиялдеги.
Гьединаб даражаялъул чемпионат СКФОялда тIоцебесеб нухалда гIуцIулеб букIиналъулги бицун, Владимир Васильевас гьадин абуна: «Гьеб ккола нилъ чIухIизе кколеб хIужаги кIудияб жавабчилъиги. ГIезегIан хIалтIи гьабун буго – баркала гьелъухъ. Россиялъул Спортивияб гугариялъул федерациялъ гьабураб божилъиялъе нижеца кьела мустахIикъаб жаваб», – ан.
Гьес ракIалдещвезаруна машгьурал гугарухъаби-дагъистаниял: ГIали ГIалиев, Загъалав ГIабдулабегов, Владимир Юмин, Бувайсар Сайтиев, Мавлет Батиров ва цогидалги. «Гьезул адаб гьабула Дагъистаналдаги республика тун къватIибги. Гьезул ирсилаз рихьизарулел руго лъикIал хIасилал. Гьелъие нугIлъи гьабула эркенаб гугариялъул рахъалъ XIX халкъазда гьоркьосеб турниралда нилъеразе щварал медалазги: дагъистаниязе щвана анкьго меседилги ункъо гIарцулги медаль. Каспийскалда тIобитIизе бугеб турниралдаги гьединаб хIасил ккеялде хьул буго нижер», — ан бицана республикаялъул бетIерас.
Турнир тIобитIизе буго ГIали ГIалиевасул цIаралда бугеб спорталъул кIалгIаялда.
