ХIукуматалъул цIияв председатель

Цогидал регионазул хIалбихьиги кьочIое босун

Дагъистаналъул Халкъияб Собраниялъул иргадулаб сессия букIана гIадатияб гуреб. Халгьабиялде босун букIана гIицIго цо суал — Дагъистаналъул хIукуматалъул председателасул хъулухъалде чи тIами.
ГIажаибаб сихIкъотIиялъул ахIвал-хIалалда кIалъазе ва­хъа­рав республикаялъул бетIера­сул ишал тIуралев В. Васильевас бицана республикаялда бу­геб лъикIаб гуреб ахIвал-хIа­лалъул. Дагъистаналда гIицIго Газпромалъе кьезе бугеб налъул къадар чанго миллиардалде бахун букIиналъул, халкъалъул гIумруялъул даража гIодобегIанаб букIиналъул ва бугеб ахIвал-хIалалдаса гьел ра­зи гьечIолъиялъул бицана гьес.
Гьел шартIазда хIажат вугин хIукуматалъул цIияв бетIерилан къокъ гьабуна гьес калам.
Хадуб абуна Артем Здунов вукIанин Россиялъул Президентасул Администрациялъул кад­рабазул сияхIалда. «Гьев гьаб­сагIат хIалтIулев вуго Татарстан Республикаялъул экономикаялъул министрлъун ва бокьун буго гьев Дагъистан хIукуматалъул председателасул хъулухъалде тIамиялъе нужеца разилъи кьезе», — ян хитIаб гьабуна В.Васильевас депутатаздехун.
Бицана Артем Здунов ДРялъул хIукуматалъул председательлъун тIамизе бокьун букIиналъул.
Гьелдаса хадуб, Дагъистан Республикаялъул Конституциялда рекъон, республикаялъул социалияб ва экономикияб цебетIеялъул рахъалъ жиндирго программа цIалана Артем Здуновас. Гьес тIадчIей гьабуна республикаялда налогал ракIариялъул суалалда. Предпринимателазул рахъкквеялъул, гьезие хIалтIизе ресал чIезариялъул, лъайкьеялъул, ракьаздаса битIун пайда босиялъул суалал аслияллъун ругилан бицана гьес.
Дагъистаналъ Татарстаналъулгун экономикияб, культурияб рахъалъ цадахъ рекъон хIалтIи гьабиялъул бугеб къотIи-къаялъул хIакъалъулъги бицана Здуновас.
Депутатаз гьесие суалалги кьуна. Депутатал ХIамид Аскерхановасул ва ЯхIия ХIажиевасул рахIатхвезабун бугоан экономика щула гьабиялъул ва росдал магIишаталъул нигIматал ричиялъул, гьезул багьабазул.
Балъгояб гьаркьида Дагъистан хIукуматалъул председателасул хъулухъалде А.Здунов тIамиялъе разилъиялъул суал лъедал, депутатазул щугояс хутIизегIан, гьесие гьаркьал кьуна. КIиго депутатас цониги рахъалде гьаракь кьечIо.
Зикрула Илясов

Хиса-баси

Щуабилеб февралалда ДРя­лъул бетIерасул ишал тIуралев Владимир Васильевас хъулухъалдаса эркен гьаруна республикаялъул хIукуматалъул министрал. ГьабсагIаталда гIуцIулеб буго цIияб хIукумат. Гьелда бан, гьал къоязда гьадинал хиса-басиял гьаруна ДРялъул хIу­куматалда.
ДРялъул бетIерасул ишал тIуралев Владимир Васильевас гъолбасараб указалда рекъон, республикаялъул премьер-ми­нистрлъун тIамуна Артем Здунов. Гьеб хъулухъалда гьев тас­дикъ гьавуна ДРялъул Халкъияб Собраниялъул иргадулаб гу­реб данделъиялда депутатазги.
Здунов Артем Алексеевич гьавуна 1978 соналъул 18 маялда Казаналда. 2000 соналда лъугIизабуна Казаналъул финансазулгун экономикаялъул институт. Вузалда цIалулаго, гьев вукIана студентазул проф­комалъул председателасул заместительлъун. 2001-2004 соназда цIалана рехсараб институталъул аспирантураялда ва 2005 соналда цIунана экономикиял гIелмабазул кандидатлъиялъе диссертация. 2004-2006 соназда гьенивго хIалтIана преподавательлъун макроэкономикаялъулги экономикияб теориялъулги кафедраялда.
2006-2010 соназда вукIана Татарстан Республикаялъул гIелмияб академиялъул экономикияб цIех-рехазул институталъул директорасул заместительлъун.
2010-2014 соназда хIалтIана Татарстаналъул экономикаялъул министрасул заместительлъун ва 2014 соналдаса нахъе вукIана экономикаялъул министрлъун.
Артемида камилго лъала ингилис мацI. Татарстана­лъул гIелмабазул академия­лъул къецалда гьев мустахIикълъана «Бищунго лъикIав гIалим­чи-2009» абураб шапакъаталъе.
Артем Здуновас лъай камил гьабуна Кембриджалъул университеталда (2009 с.), РФялъул президентасда цебе рагьараб Россиялъул росдал магIишаталъулги пачалихъияб хъулухъалъулги академиялда (2011 с. ва 2012 с.), Лондоналъул Бизнесалъул школалда (2015-2016 с.с.) ва цогидалги гIелмиял центраздагун вузазда.
2008 соналда Здуновасе кьуна Татарстаналъул Экономикая­лъул министерствоялъул ХIурма­та­лъул грамота, 2012 соналда – РФялъул Экономикияб це­бетIеялъул министерствоялъул Бар­калаялъул кагъат, 2013 ва 2014 соназда – ТРялъул Экономикая­лъул министрасул баркала, 2014 со­налда – РФялъул экономикияб це­бетIеялъул министерствоялъул ХIурматалъул грамота.
Артем Здуновасул буго хъизан ва васги ясги.
* * *
ДРялъул бетIерасул ишал тIуралев Владимир Васильевасул указалда рекъон, республикаялъул хIукуматалъул вице-премьерлъун ва гьединго лъайкьеялъул министрлъун тIамуна Уммупазил ГIумарова.
* * *
ДРялъул бетIерасул ишал тIуралев Владимир Васильевасул указалда рекъон, республикаялъул экономикаялъул ва территориалияб цебетIеялъул министрлъун тIамуна ГIусман Хасбулатов. Цевеккун гьев вукIана республикаялъулаб МФЦялъул нухмалъулевлъун.