«Большие семейные выходные» абураб, тIолабго улкаялда тIобитIулеб бугеб тадбиралъул бицине данделъун рукIана ункъабилеб июлалда «Дагъистан» РИАялда.
Журналисталгун дандчIвазе рачIун рукIана республикаялъул культураялъул министр Зарема Бутаева, Тахо-Годил цIаралда бугеб миллияб музеялъул директор Пахрудин МухIамадов ва Поэзиялъул театралъул директоралъул заместитель Ариза Батирова.
Гьез бицана, гьеб проекталда рекъон, МахIачхъалаялда тIоритIизе ругел тадбиразул хIакъалъулъ.
Проекталъ нуцIби рагьизе руго тIолгороссиялъул хъизамалъул къоялда цебе, ай 6-7 июлалда.
Масала, тIоцебесеб сентябралде щвезегIан, Поэзиялъул театралда хIалтIизе буго «Театральная суббота» абураб проект. Щибаб шамат къоялъ гьенире рачIине бегьула хъизамал. Гьелгун дандIчвазе руго театралъул актерал, бицине буго адабияталъул, маданияталъул. БукIине буго «эркенаб микрофонги». Лъималазеги рес щвезе буго жидерго кучIдул, харбал цIализе.
— «Воскресный вечер» проекталда рекъон, щибаб гьатIаналъ гьединалго тадбирал рукIине руго Миллияб музеялдаги. ТIоритIизе руго творческиял конкурсал, батIи-батIияб махщел бугел хъизамазулгун дандчIваял. Гьезги тIоритIизе руго мастер-классал.
Гьеб проекталда рекъон гьабулеб хIалтIи цебего байбихьун буго Россиялъул цогидал регионазда. Нилъецаги гьал къоязда байбихьи лъезе буго. Республикаялда машгьурал хъизамазулгун дандчIваялги тIоритIизе руго.
Гьединго халкъалъ къабул гьарурал «Уличный музыкант», «Открытая библиотека» проектазги жидерго хIалтIи гьабизе буго. Аслияб къагIидаялда дандеруссинал рукIине руго Мах1ачхъалаялда бугеб Стальскиясул бульваралда, Поэзиялъул театралда ва Миллияб музеялда, — йилан бицана З. Бутаевалъ.
Шамай Хъазанбиева
