ГьабсагIаталда дунялалдаго унеб буго микробазде данде къеркьолел дараби битIун хIалтIизариялъул анкь. Гьединлъидал, РФялъул Сахлъи цIуниялъул министерствоялъул буюрухъалда рекъон, 17-24 ноябрь лъазабун буго Микробазде дандечIей гьабиялъул анкьлъун. Гьелда бан гIуцIизе кколел тадбиразулги, бактериязулги, гьезде данде гьарулел дарабазулги хIакъалъулъ нижее бицана Республикаялъул урологияб централъул тохтур-уролог ХIусен Къадиевас.
— ХIусен, бактериязул антибиотиказде дандечIезе бажариян сунда абулеб?
— Нилъер цIакан бахани, черх загIиплъани, гьабула батIи-батIияб дару. Гьезда гьоркьор рукIуна антибиотикалги – микробазулги, бактериязулги, вирусазулги ва инсанасул чорхол сахлъиялъе заралиял цогидалги жал тIагIинариялъе квербакъулел дараби. Амма гьединал дараби гIемер яги мекъи хIалтIизаруни, бактериял гьезде ругьунлъула ва чорхолъа гьел инаризе бажаруларо. Гьеб мехалда тохтур хIажатавлъун ккола жеги къуватал антибиотикал хIалтIизаризе.
— Урологиялъул унти бугев чиясе кинаб хIинкъи бугеб гьелъул?
— Микробазулгун бактериязул хIаракаталъул хIасил ккола цистит (кIващул цIуни) ва пиелонефрит (ургьисалабазулъ рецIцI ккей). Гьезде данде гьарулел антибиотиказде микробал ругьунлъун ругони, хьверд гIемерлъула ва операция гьабизе ккола.
— Бактериял кин ругьунлъулел антибиотиказде?
— Гьеб буго тIабигIияб иш, амма дараби мекъи хIалтIизариялъ инсанасги кумек гьабула бактериязул гьеб хасият цIунизе. Тохтурасухъе инчIого, живго жинцаго сахлъизавизе лъугьарав чияс жиндиего зарал гьабула. Щайгурелъул гьесда лъаларо даруялъул роцен ва чан къоялъ гьекъезе кколебали.
Бактериязгун вирусаз зарал гьабула нилъеца рокъор хьихьулел хIайваназеги. Гьезиеги гьарула уколал, кьола антибиотикал. ГIемер дараби гьарураб хIайваналъул гьан кваназеги лъикIаб гьеч1о. Гьелъ антибиотиказде дандечIей загIиплъизабула.
— Тохтурасда кин лъалеб пуланаб антибиотикалъ унтарасе кумек гьабулареблъи?
— Гьабураб даруялъ лъабго къоялдаса кумек гьабулеб гьечIони, гьеб хисизе ккола. Дару гьабилелде лъикIаб буго вирусазул, микробазул антибиотиказде дандечIей бугищ-гьечIищали халгьабулеб анализ кьезе. Жеги лъикIаб буго, кинабгIаги антибиотик хIалтIизабилалдего анализ гьабуни.
— Антибиотиказде ккунгутIиялъе щиб гьабизе кколеб?
— ЗахIматаб хIалалде ккелалде, кванилги рацIцIалъиялъулги низам цIунизе ккола. ХIалтIизарила хурдузул дараби. Больницаялда ругел гIагарал чагIазухъе гIисинлъимал рачунге, нужгоги гIемер хьвадуге. Больницаялда вегун вугони, мадугьалзабазухъе гIемер хьвадуге — гьениса цIияб вирус щвезе рес буго.
РакIбацIцIадго хIалтIизе ккола гIанкIуял, хIайванал хьихьулел предпринимателалги. Гьездаги бараб бугелъул инсанасул сахлъиялъул иш.
РУЦалъул пресс-хъулухъ
