Исана Россиялдаса хIежалде унезул къадар 4500 чиясдалъун цIикIкIинабун буго. Гьединаб баян кьуна Уфаялда букIараб данделъиялда хIеж-миссиялъул нухмалъулев, РФялъул федерациялъул советалъул сенатор Иляс ГIумахановас.
Гьанже нилъер улкаялдаса хIежалде ине рес щвезе буго 25 азарго чиясе. ГьанжелъизегIан 20 000 чиясе бакI кьолаан СагIудиязул ГIарабиязул Къираллъиялъ. Щуазарго чиясдалъун гьеб къадар цIикIкIинабизе кIванин сагIудиязулгун лъикIал гьоркьорлъаби рукIиналъилан абуна Иляс ГIумахановас.
Гьелъул хIакъалъулъ дагьаб гIатIидаб баян кьуна «ХIакъикъаталъе» Иляс ГIумахановасул кумекчи ХIизбула Асуевас.
«Исана СагIудиялде ахIун рукIана ниж хIежалъул суалал тIуралев гьезул министрас. Гьениб Иляс ГIумахановас чIванкъотIун абуна Россиялъе бугеб квота цIикIкIинабизе кколилан. Щайин абуни, Калининградалдаса байбихьун, Приморьеялде щвезегIан цIакъ гIемерал бусурбаби ругин жакъа Россиялда. 1999 соналъго чIезабураб квота букIана Россиялъе — 20 000 чи.
Гьелъ щибаб соналъ тIадеги гьаризе кколаан 2000, 3000 ва 5000 чиясе бакI. Гьанже кидаго нилъее чIезабураб квота букIине буго 25 000 бакI. Гьеб щвезе ккани, цин Россиялъул МИДалдаса официалияб кагъат битIун тIалаб гьабизе кколаан гьезул низамалда рекъон. Амма Иляс ГIумахановасда кIвана гьеб суал СагIудиялда вукIаго роцIцIинабизе», — ян бицана ХIизбула Асуевас.
