Гьаб анкьил итни къоялъ Шамилхъалаялде рачIун рукIана «ХIакъикъат» газеталъул бетIерав редакторасул ишал тIуралев ГIумахан ГIумаханов, гьесул заместитель Пайзула Пайзулаев. Гьел дандчIвана Унсоколо районалъул бетIер ГIиса НурмухIамадовгун.

 

 

МагIарул мацIалда, миллияб тарихалда хурхун, гьеб цIунизе ккеялда – газеталда гьелъул рахъалъ гьабизе бугеб хIалтIул рахъалъ пайдаяб гара-чIвари ккана гьениб. ГIиса НурмухIамадовас тIадчIей гьабуна росабазул гIумруялъул, гIадатиял гIадамазул хIакъалъулъ хъваялде газеталъ кIвар кьуни лъикIаб букIиналде. МахIачхъалаялдаго чIун, магIарул районазде, росабалъе «ХIакъикъаталъул» мухбирал къанагIатги рачIунел гьечIилан. Нусго сонилаб тарих гирараб магIарул газета халкъалъе бокьула, гьеб цIунизе ва цIигьабизе тавпикъги кьейги нужое ян абуна районалъул бетIерас. Жал кидаго хIадурал ругила «ХIакъикъат» газеталъе кумек гьабизе, ай гIуцIараб къагIидаялда гьелъие подписка гьабизе.

 

 

«ХIакъикъат» газеталъул редакторгун гьесул заместительги гьединго дандчIвана федералияб почалъул бухьеналъул (УФПС) Шамилхъалаялъул почтамталъул начальник МухIамад ИсмагIиловгун, республикаялъул УФПСалъул директорасул заместитель ГIабдурахIман МухIамадовгун. ДандчIваялда гIахьаллъи гьабуна мугIрузул районазул ва росабазул почалъул отделениябазул начальниказги.

 

 

Гьеб данделъиялда гара-чIвари ккана «ХIакъикъат» газеталъе подписка гьабиялъул, хъварал газетал гIужда щолел гьечIолъиялъул. Гьеб пайдаб дандчIваялъул ахиралда кIиябго рахъалдасан дандбана ругел квал-квалал лъугIизариялъе гьаризе кколел тадбирал.

 

 

«ХIакъикъат» газеталъул редакторасул ва гьесул заместителасул бакIазде ун гьединал дандчIваял рукIана Шамил, ЛъаратIа, ЦIумада, ЦIунтIа, ГIахьвахъ, Гъуниб, ЧIарада, Хьаргаби, Гъизилюрт районазул, БежтIа участкаялъул нухмалъулезулгунги.

 

 

 

Масала, гьаб буго Гъуниб районалъул бетIер МудунхIажи Къадировасулгун букIараб дандчIваялдаса сурат. 

 

 

Гьаб цояб ккола «ЦIумадисезул гьаракь» газеталъул редакциялда бахъараб сурат. 

 

 

 

ГIумахан ГIумахановгун Пайзула Пайзулаев щвана Хунзахъ районалъул «Росдал захIматчи» газеталъул редакциялдеги.