Дагъистаниязул иргадулаб бергьенлъи
«Авадан» кьурдул ансамблялъе щвана тIоцебесеб бакI
5-10 январалда Сочиялда тIобитIараб миллияб маданияталъул ва искусствоялъул конкурс-фестивалалда гIахьаллъана батIи-батIиял улкабаздаса 500-ялдаса цIикIкIун коллектив. ГIахьаллъана гьенир Дагъистаналдаса гьунарчагIиги махщелчагIиги.
Конкурс гIуцIиялъул проекталъул координатор Жанна Барсеговалъ бицана конкурсалде рачIарал коллективазул тIадегIанаб даражаялъул хIадурлъиялъул хIакъалъулъ.
— Миллияб байрамалде рачIарал коллективаз цого майданалда бихьизабуна жидерго миллияб маданияталъул борхалъиги тIадегIанлъиги. Щивав гIахьалчиясулъ бихьулеб букIана миллияб хаслъи, — ян абуна гьелъ.
Радалалдаса къасилъизегIан, къойил цебе бахъунаан 80 коллектив. Жюриялъул членал мукIурлъана жидее цIакъ захIмат букIанила гIахьалчагIазул цоялдаса цоял лъикIал церерахъиназе къимат кьезе. Рехселин гьезул цо-цоязул цIаралги: фестиваль гIуцIаразул цояв Виктор Шерф, режиссер-хореограф Эльвира Таха, музыкалияб искусствоялъул профессор Лариса Семина ва цогидалги.
Фестивалалда гIахьаллъараб Лаваша районалъул «Авадан» кьурдул ансамблялъе щвана тIоцебесеб бакI ва аслияб приз — Гран-при. Коллектив ине буго СагIудиязул ГIарабиялде. Гьелде тIадеги, Виктор Шерфица кьуна хасаб приз. Кьурдухъаби ритIулел руго Германиялде.
Гьединго фестивалалъул шапакъатал щвана гьоцIдерил ва ансадерил махщелчагIазеги. Гьез тIоритIарал мастер-классаз пана гьаруна Италиялдаса, Германиялдаса, Малайзиялдаса ва цогидалги улкабаздаса рачIарал гьалбал.
КIудияб баркала загьир гьабуна фестиваль гIуцIаразе Лаваша районалъул культураялъул управлениялъул начальник Халид МутIалимовас.
ПатIимат Расулова
