24 маялда улкаялда байбихьана исана школа лъугIулел цIалдохъабазул аттестациялъул аслияб бутIа. гьелда бан «Дагъистан-РИА» информалаталъул залалда тIобитIана ДРялъул лъай кьеялъул ва гIелмуялъул министрасул тIоцеесей заместитель Аида ТIалхIатовалъул пресс-конференция.
Министрасул тIоцеесей заместителалъ бицана ОГЭялдеги ЕГЭялдеги хIадурлъулаго, министерствоялъ гIуцIарал тадбиразул хIакъалъулъ. Масала, щибаб школалъул директоргун ва муниципалитетазул бутIрулгун тIобитIун буго данделъи. Гьениб мухIканго дандран руго пачалихъиял экзаменазда гIадлу-низам букIинабиялъулги, низамалъул тIалабал цIунизе ккеялъулги суалал.
Исана рукIине ругел цIигьариязда гьоркьор А. ТIалхIатовалъ рехсана ОГЭялдаги видео-камераби лъолел рукIин. «Гьеб буго ракIбацIцIадго экзамен тIобитIиялъул мурадалда гьабулеб тадбир», — ан абуна гьелъ.
ЕГЭ кьолаго, цересел соназда ккана пашманал лъугьа-бахъинал (цо-цо цIалдохъабаз хиял гьабуна гIумруялдаса ратIалъизецин). Гьединал хIужаби исанаги такрарлъунгутIиялъул мурадалда, школазул нухмалъулесда тIадаб ишлъун министрасул заместителалъ рехсана цIалдохъабазе психологияб кумек гьаби. «Гьединаб кумекалъе ресал ратизе кколин абун бицана муниципалитетазда тIоритIарал дандчIваяздаги. ЦIалдохъабазе психологияб кумек гьабизе ккола тIоцебесеб иргаялда эбел-инсуца. Экзаменалда дагьал балл щванин абун, дунялалдасаго рокьи бичун рукIине бегьулареблъиги, исана кьун бажаричIеб экзамен цоги нухалда кьезе рес букIунеблъиги бичIчIизабизе ккола гьез жидерго лъималазда. Школазда руго психологиял хъулухъал – гьелги гIахьаллъизе ккола гьеб ишалъулъ», — ан бицана А. ТIалхIатовалъ.
Гьелъул баяналда рекъон, 2021 соналда ГИА гIуцIиялъул рахъалъ Россиялъул регионазул рейтингалда Дагъистан букIана 84-абилеб бакIалда. «Гъоркьиса нилъ ккана 69-абилеб бакIалде. Рособрнадзоралъул нухмалъулез абуна, Дагъистан букIинаан бищун лъикI ГИА гIуцIараб 30 регионалда гьоркьобилан. Гьелъие квалквал гьабуна Интернеталда КИМал лъеялъул лъабго хIужа тIатиналъ», – ан бицана А. ТIалхIатовалъ.
Исана ЕГЭ кьезе буго 12784 цIалдохъанас. Гьезда гьоркьов вуго исана школа лъугIарав 10915 цIалдохъанги цересел соназда школа лъугIизабурав 1352 чиги. ОГЭ кьезе буго 41210 цIалдохъанас (араб соналде дандеккун, 6500 чи цIикIкIун вуго исана). ГИА кьолел цIалдохъабазул къадар гIемерлъиялда бан, исана цIикIкIинаризе ккана экзамен къабул гьарулел пунктал (ППЭ). ГьабсагIаталда хIадурун буго ЕГЭ къабул гьабулеб 74 пункт. Гьезда гьоркьоса 64 – лъай кьеялъул идарабазда ва хутIарал – рокъор (сакъатал лъималазухъа экзамен къабул гьабизе) ва туснахъазда.
