29 марталда «Дагестанская правда» газеталда тIобитIана республикаялъул пачалихъияб архивалъул бугеб ахIвал-хIалалъул хIакъалъулъ журналистазе бицана ДРялъул юстициялъул министрасул заместитель Сергей Караченцевас.
Гьесул рагlабаз рекъон, пачалихъияб централияб архивалда (ЦГП) цIунун буго миллионалдасаги цIикIкIун документ. Архивалъул нухмалъиялда ракIалда буго гьел киналго документазе оцифровка гьабизе. Киназдаго рихьизаризе бегьулел документал лъезе руго интернеталдаги. Гьелъие гIоло интернет-сурсаталда гIуцIизе буго пачалихъияб централияб архивалъул электронияб цIалул зал.
1990-абилел соназда гIемерисел идараби къана. Цо-цояз документал архивалдего кьечIо. Гьеб заманалда къарал идарабазда хIалтIулел рукIарал гIадамазда, стаж чIезабулаго яги кинаб бугониги документ балагьулаго гIемерал захIмалъаби дандчIвалел руго.
Щибаб муниципалитеталъул архив
ХIалтIулел рукIараб бакIалдаса справка хIажалъун, гIемер рекерахъдизе ккола хасго пенсиялъул ригьалда ругел гIадамал. ХIажатаб документ щвезе ккани, киве ине кколев магIарухъ гIумру гьабун вугев гIадатияв пенсионер? Кинаб хIалалда бугеб доб заманалъул архив? Гьел суалазе жавабал кьолаго, гьадин бицана С. Караченцевас:
— Пачалихъияб централияб архивалъул сайталде гIарзаги хъван яги почалдасан битIун бегьула архивалдаса хIажатаб справка тIалаб гьабизе. Амма хIалтIул стаж лъазе къваригIун справка цIехолеб батани, гьеб щола гIицIго гьев чи хIалтIулев вукIараб муниципалитеталдаса. Пачалихъияб централияб архивалде рачIун рукIана гIицIго МахIачхъалаялда хIалтIулел рукIарал идарабазул документал. Щибаб районалда буго жиндирго муниципалияб архив. Щибаб администрациялъ жидерго архивалда цIунун рукIуна бакIалъулал гIуцIабазул документал. ХIажатал справкабазда хадурги муниципалиял архивазде ине ккола. Щибаб архивалъул букIине ккола жидерго сайтги, справка хIажалъарав чияс хитIаб гьабизе бегьулеб.
ГьабсагIаталда муниципалиял архивал ккола документал цIунараб ва цо специалистасде кинабго жавабчилъи тIаде бегизабураб бакI. Электронияб къагIидаялдеги гьел руссинарун гьечIо. Цин централияб архивалда ругел документал росизе ккола электронияб къагIидаялде, хадуб муниципалияздеги ирга щвела.
ЦГПялъул ва муниципалиял гIуцIабазда ругелги малъун, жакъа республикаялъул архивазда хIалтIулев вуго 158 хIалтIухъан. Гьез гьабизе кколеб хIалтIийин абуни буго цIакъго гIемераб. Архивалъул хIалтIухъаби хIадур гьарулел цIалул идарабиги гьечIо Дагъистаналда. ГIолилазеги бокьулеб гьечIо чIамучIаб гьеб хIалтIи.
ПАТIИМАТ СУЛТIАНМУХIАМАДОВА
