Дагъистаналъул халкъияв шагIир, Хъвадарухъабазул союзалъул нухмалъулев МухIамад АхIмадовасе щун буго Адабияталда жаниб гьабураб хъулухъалъухъ — «За заслуги перед литературой» абураб, Россиялъул Хъвадарухъабазул Союзалъул шапакъат. ХIамзатил Расул гьавуралдаса 99 сон тIубай республикаялда кIодо гьабулел къояз, Театралъул поэзиялда букIараб Россиялъул хъвадарухъабазул пленумалда кьуна гьесие гьеб хIурматияб гIаламат. МухIамадида гьеб шапакъатги баркун, ХIамзатил Расулил «ХъахIал къункърабазул къоял» республикаялда кин тIоритIарал ва жибго пленумалда тIасан гьесулгун ккараб гьитIинабго гара-чIвари кьолеб буго жакъасеб номералда.
— МухIамад, баркула шапакъатги. Кин арал исана «ХъахIал къункърабазул къоял» республикаялда? Щиб букIараб цIияб жо гьениб?
— Баркала. ХIамзатил Расул гьавуралдаса щибаб соналъ республикаялда тIобитIулеб тадбир исана цIакъ берцинго, гьарзаго анин абизе бегьула. Россиялъул хъвадарухъабазул тIубараб правлениего бакIарун букIана МахIачхъалаялда. Улкаялъул регионаздаса 40-гIанасев хъвадарухъанги гIахьаллъун, Поэзиялъул Театралда тIобитIана пленум. Гьеб букIана тIадеялъул февралалда Москваялда тIобитIизе бугеб Россиялъул Хъвадарухъабазул Съездалъе гьабулеб хIадурлъилъун. ГIемерал, кIвар бугел суалал гьоркьор лъуна, адабияталъул бицана. Гьанже цо-цо цIирагьиялги раккун руго. Мисалалъе, гьалдаса хадуб хъвадарухъабазул тIахьал къватIире риччалаго, цо кечI магIарулалъги, лъун аскIобго гьелъул таржама гьабураб кечIги лъезе буго. Цо гьединаб «АхIуд рахъарал кучIдул» абураб дир тIехь бачIине буго кватIичIого Москваялда.
Дагъистаналъул Хъвадарухъабазул союзалъ гIемераб хIалтIи гьабулеб буго адабият цебетIеялъе. ШагIирзабазул тIахьал къватIире риччала, улкаялъул гьединго къватIисел пачалихъазда тIоритIулел литератураялъул тадбиразда нижеца гIахьаллъи гьабула. Щибаб соналъ республикаялда тIоритIула Расулил «ХъахIал къункърабазул къоял». Исанасеб тадбир гьединго букIана, тIадеялъул кIодо гьабизе бугеб гьесул нусго сонил юбилеялъул байбихьилъилъун. Гьебги-добги хIисабалде босун гьабураб хIукму букIана Россиялъул Хъвадарухъабазул cоюзалъул исанасеб пленум МахIачхъалаялда тIобитIизе.
Гьединго МухIамадица бицана ХIамзатил Расулил 100 сон кIодо гьабиялде Хъвадарухъабазул союзги гьединго республикаги хIадурлъулеб бугеб куцалъул, улкаялъул даражаялда тIадеялъул гьеб кIодо гьабизе букIиналъул. Гьелъул хIакъалъулъ нижеца гIатIидго бицина газеталъул хадусел номеразда.
