23 августалда ДРялъул хIукуматалъул нухмалъулев ГI. ГIабдулмуслимов дандчIвана РФялъул бахIарчи, генерал-майор, ЛНРалъул милициялъул кIиабилеб халкъияб корпусалъул командующий Эседула Абачаевгун.
Эседула Абачаев ккола Хив районалъул Зилдик росулъа. Гьес лъугIизабуна Харьковалъул гвардиялъул тIадегIанаб танковияб команднияб училище, РФялъул ВСялъул гIаммал войскабазул академия ва РФялъул ВСялъул Генштабалъул Военнияб академия.
ЛНР эркен гьабиялъулъ гьабураб жигараб гIахьаллъиялъухъ В. Путинил хIукмуялда рекъон, гьаб соналъул июль моцIалда Абачаев «РФялъул бахIарчи» абураб цIаралъе мустахIикъавлъун вихьизавуна. Гьединго, апрель моцIалда гьесие кьуна «ЛНРалъул БахIарчи» абураб цIарги.
ГIабдулмуслим ГIабдулмуслимовас, «Россиялъул БахIарчи» абураб цIар щвейги баркун, абуна рагъулал масъалаби тIуразаруралъухъги бахIарчилъиялъухъги Эседула мустахIикъав вугин гьеб шапакъаталъеян.
«Пачалихъиял масъалаби тIуразарулаго, нужерго ВатIаналъулги гIадамазулги гIумру цIунулаго, нужеца бихьинчилъиги бахIарчилъиги бихьизабулеб буго. Нужер бахIарчиял ишазулги къохIехьеялъулги нижеца кIудияб къимат гьабула. Нуж руго нилъер улкаялъего чIухIилъунги гIун бачIунеб гIелалъе мисаллъунги», — ян абуна ДРялъул хIукуматалъул нухмалъулес.
