Анкьил хIасилал
ДРялъул бетIерасул ишал тIуралев Владимир Васильев дандчIвана Россиялъул оборонаялъул министрасул заместитель Тимур Ивановгун
Данделъиялда гIахьаллъана Россиялъул Оборонаялъул министерствоялъул департаменталъул директор Михаил Сапунов, Югалъулаб рагъул округалъул аскаразул бетIерасул заместитель МухIамад Хандаев, Каспийскалъул флотилиялъул бетIерасул заместитель Александр Прохоров, ДРялъул хIукуматалъул председатель Артем Здунов, экономикаялъул министр ГIусман Хасбулатов, вице-премьерасул ишал тIуралев Рамазан Жафаров, сахлъицIуниялъул министр Жамалудин ХIажиибрагьимов.
Данделъи рагьулаго, Владимир Васильевас ракIалдещвезабуна Россиялъул президентасулги 1999 соналда рагъулал лъугьа-бахъиназул гIахьалчагIазулги букIараб дандчIвай.
Хадуб Дагъистаналъул бетIерас ва Тимур Ивановас дандрана рагъулал хъулухъчагIазул лъимал гьез хъулухъ гьабулеб бакIалда ругел школазде ва ясли-ахазде росизе ва гьезул руччаби хIалтIудалъун хьезаризе ккеялъул суалал.
Гьединго гьоркьоб лъун букIана Болъихъ бугеб ясли-ахги школаги бакIалъулаб администрациялъул къайимлъиялде кьезе ккеялъул ва Каспийскалъул флотилиялда рагъулаб хъулухъалда ругезе жанир чIезе минаби разе ккеялъул масъалабиги.
КватIичIого Каспийскалда байбихьизе буго цIиял бакIал разе. Гьездаго гьоркьор разе руго хIухьбахъиялъул ва рекIелгъеялъул централги гумул чIолел ва гидротехникиял бакIалги.
Шамай Хъазанбиева
