18 апрелалда Дагъистаналъул гуманитарияб институталда тIобитIана студентазул гIелмияб дандеруссин. Гьеб нухда бачана ункъабилеб курсалъул студент ШагIбан МухIамадовас.
КIалъазе вахъарав ДГИялъул ректор, техникиял гIелмабазул кандидат НухIкъади БахIмудкъадиевас бицана жакъа дунялалда бугеб ахIвал-хIалалъул ва хIалуцараб заманалда гIелмуялъул бугеб кIваралъул хIакъалъулъ.
Дагъистаналъул гуманитарияб институталда гьарулел гIелмиял цIех-рехазул хIасил гьабуна институталъул проректор, тарихиял гIелмабазул доктор, гIелмуялъулгун инновациязул рахъалъ проректор ХIайбула МухIамадсалихIовас. Масъалабазда гьоркьоб гьес рехсана студентазул ва преподавателазул проекталъулаб хIаракаталде гъирабазабиялъе рес щолеб гьечIолъи.
Гьанжесеб жамгIияталда гIалимзабазул хIаракаталде кIвар кьолеб гьечIолъиялде пикру буссинабуна экономикиял гIелмабазул кандидат, Гражданияб жамгIият цебетIезабиялъул ва инсанасул ихтиярал цIуниялъул рахъалъ ДРялъул бетIерасда цебе гIуцIараб Советалъул председатель, «ХIакъикъаталъул» бетIерав редакторасул заместитель Зикрула Ильясовас.
Студентазде хитIаб гьабулаго, ДГУялъул философиялъул кафедраялъул заведующий, профессор МустIапа Билаловас абуна гIелмиял докладазда гьоркьоб философиялъул масъалабазул хIакъалъулъ бицунеб доклад къанагIат гурони батуларин абун. Рехсана гьес гIелмияб цIех-рехалъе мустахIикъал темабиги. ДГИялъе тIахьалги сайгъат гьаруна.
ДРялъул Миллияб политикаялъулгун диниял ишазул министерствоялъул вакил Расул ХIажиевас ракIалде щвезаруна 1990-абилел сонал. «Доб заманалда нилъер гIолилал унаан къватIисел улкабазул диниял цIалул идарабазда цIализе. БатIи-батIиял пачалихъазул вузаздаса гьез нилъехъе бачIана батIи-батIияб динияб пикруги. Гьелъул кьучIалда бикь-бикьана жамгIият ва ккана хIалуцарал лъугьа-бахъинал. Жакъа республикаялда буго анлъго исламияб вузги 16 мадрасаги. Гьезул буго Рособрнадзоралъ ва Лъай кьеялъул министерствоялъ кьурал лицензияби. Нилъер вуго исламиял гIелмабазул 12 доктор. Гьединаб хIаракаталъул хIасил буго жакъасеб парахалъи», — ян бицана гьес.
Дандеруссиналъул гIахьалчагIазе икъбал гьарун кIалъана Башларовасул цIаралда бугеб медицинаялъул колледжалъул директор ХIусен Мамаевги Дагъистаналъул гуманитарияб колледжалъул директор Алаудин Наримановги.
Кавсарат Сулейманова
