10 февралалда бухIана ХIибиялъ росдал школалъул мина. Гьенив цIалулев вукIана 58 цIалдохъан. Школа бан букIана 1980 соналда.

   Гьеб лъугьа-бахъиналда бан, ДРялъул хIукуматалъул председатель ГIабдулпатахI ГIамирхановас тIобитIараб данделъиялда бицана цIалдохъабазе санагIатал шартIал чIезариялъул мурадалда, ХIибиялъ росулъ бугеб ахIвал-хIалалъул хал гьабизе ва хасаб комиссия гIуцIизе кколин абун.

  Къварилъи ккарал гIадамазе хехаб заманалда кумек гьабизе кколин абун лъазабун буго республикаялъул бетIер Сергей Меликовасги. ХIадур руго, ресалги ратун, школалъе цIияб мина базеги. Школалъул проект хIадуриялъе хIажалъун буго росулъ бугеб демографияб хIал мухIкан гьабизе ва гьелде харж гьабизе кколеб гIарцул роцен борцине. Гьел масъалаби тIуразариялъул мурадалда хIукуматалъул председателасул заместителасул ишал тIуралев Мурад Казиевасул нухмалъиялда гъоркь гIуцIараб хIукуматалъулаб комиссия 16 февралалда щвана ЦIунтIа районалде.

   «ГьабсагIаталда лъимал цIализарулел руго росдал администрациялъулги ФАПалъулги минабазда (цебеккун гьениб букIана школа-интернат). Республикаялъул хIукуматалъул комиссиялда гъорлъ руго Ралел бакIазулги, Финансазулги, Лъай кьеялъулги ва цогидалги министерствабазул вакилзаби. Гьел щвана Мекали, Хъебалъ ва ХIибиялъ росабалъе. Лъабабго росабалъ буго школа баялъул масъала.

   ХIибиялъ росулъ цIияб школа базе хIукму гьабуна, щайгурелъул соналдаса соналде гIемерлъулел руго школалде рачине заман щварал лъимал. Школа базе буго батIияб, ай гIатIидаб, бакIалда. Жеги мухIкан гьабун гьечIо модулалъулабищ яги тайпадулабищ школа базе бугебали. Комиссиялда ругел киналго идарабазул вакилзабазул пикру хIисабалде босизе ккола гьелъул мурадалда», — ян бицана ЦIунтIа районалъул «Дидойские вести» газеталъул бетIерав редактор Адам Адамовас.

 

Кавсарат Сулейманова