18 январалда тIобитIизесеб ДРялъул Халкъияб Собраниялъул сессиялда гьоркьор лъезесел суалазул цояб ккола росабазул администрациял къаялда хурхараб законалъул проект («Об отзыве на проект федерального закона № 40361-8 «Об общих принципах организации местного самоуправления в единой системе публичной власти»).
Депутатаз гьеб къабул гьабуни, республикаялда къала 700 муниципалитет. Аграрияблъунги рикIкIунеб, бащдаб халкъалъ магIарухъ гIумруги гьабулеб нилъер гIадаб бакIалда росабазул бегавуллъиялде нуцIа къани, лъикIищ-квешищ ккелебали лъаларого, дагIба-рагIиялда руго интернеталдасан хъвадарулел нилъер ракьцоял.
Масала, цо-цояз рикIкIунеб буго бюджеталъул гIарац тIокI гьабиялъул мурадги багьанаде бачун, гIадатиял гIадамазе зарал ккезе бугин. Гьединго гIиси-бикъинал рукIаниги хъулухъаздаса махIрумлъизехъин руго росабазул гIадамал.
ЦIар рехсезе разилъичIев цо магIарул районалъул администрациялъул хIалтIухъанас загьир гьабуна гьеб законалъул проекталда тIасан жиндирго пикру.
«Квешаб бугониги, лъикIаб бугониги, гIадлу-низам буго цIакъаб жо. Амма гьеб гIадлу букIиналъе росабазул бегавулзабаз гьабулеб хIалтIи мукъсанаб буго. Гьезул гIемерисез бихьизабулеб гьечIо жидее законалъ кьун бугеб къуват, щайгурелъул муниципалияб хъулухъалъул хIакъалъулъ лъайги бажариги гьечIел чагIи рищулел рукIун гьенире.
Хас гьабун муниципалияб хъулухъалъеги цIаларал, законалги лъалел чагIи рищизе ккола бегавулзабилъун.
БакIалъул нухмалъиялъул рахъалъ федералияб законалдалъун пачалихъалъе бокьун буго жиндирго кверщелги тIалъиги щулалъизабизе. Амма росабазул бегавулзабазда хурхарал пунктал руго гьенир бищун загIипал, чIемегIал бакIал. Ругониги, букIине кколеб куцалда гьел хIалтIизаризе тIамизе кIолеб букIинчIо тIадехунисел идарабазда. Гьанже гьел гьоркьоса нахъе рахъани, лъикIлъизе бегьула нухмалъи гьаби.
Бегавулзабазул хъулухъал къанилан расги хвезе жо гьечIо. Гьез кьолел справкабиги цогидабги МФЦялдасанги щола. Гьадинги ракьуда хурхарал суалал гурони хутIун гьечIо гьанже росабазул администрациязухъ», — ин бицана гьес.
Гьеб закон къабул гьабиялдалъун иш кин ккелебали жеги чIванкъотIун лъаларин, гьеб гIицIго заманаялъ бихьизабилин абуна ДРялъул Халкъияб Собраниялъул депутат ГIабдулвахIид Лабазановас.
Гьесул рагIабазда рекъон, улкаялъул цогидал регионазда гьеб цебего къабул гьабун буго.
З. ХIАЖИЕВА
