Шагьаразда ва хасго районазда гIадамазул гIарзал камуларо унтаразухъе ахIараб хехаб кумекалъул машина цIакъго кватIун гурони щоларин абун. ГIумруялъе хIинкъи бугел ва заманалда хехаб кумек хIажалъулеб унти чIварал гIадамазухъе гьеб кIиго-лъабго сагIаталдасан гурони бачIунеб гьечIин абун медицинаялъул хIалтIухъабазде гIайибалги гьарула. Медицинаялъул гIуцIабазул нухмалъулезги, хехаб кумекалъул машинаби гIолел гьечIин абун, жидедаго гIайиб гьечIеблъи бичIчIизабула.
«Медицинаялъул хехаб кумек щвезабиялъул къагIида чIезабиялъул хIакъалъулъ» абураб РФялъул Сахлъи цIуниялъул министерствоялъул амруялда рекъон, хехаб кумек гьабиялъул кIиго къагIида буго. ТIоцебесеб – экстренияб, ай хехаб унти чIварав, хроникияб унти хIалуцарав, ай хвеялда хIинкъи бугев унтарасе кумек гьаби. Экстренияб кумек хIажаталлъун ккола – би чIезабизе бажарулареб хIалалда ругел, гIакълуялдаса ун яги хIухьел цIазе кIоларого лъугьарал, психикиял унтаби ругел (унтарас жиндиего ва аскIор ругел гIадамазул гIумруялъе зарал гьабилин хIинкъи бугони), лъимер гьабизе мех щварал руччаби, черх бухIарал, лъукъарал, лугбал рекарал, загьруял жал гьекъон яги кванан унтарал. Гьединазухъе хехаб кумек щвезе ккола 20 минуталда жаниб.
КIиабилеб къагIида ккола нахътIамизе бегьулареб – тохлъукьего унти багъарани ва унтарасул гIумруялъе хIинкъиги гьелдаса гьечIони. Гьединав унтарасухъе хехаб кумек кIиго сагIаталда жаниб щвезе бегьула.
Хехаб кумекалъул рахъ республикаялда лъикI гьечIеблъи бихьана нилъеда пандемиялъул заманалдаги. ГIураб къадаралда машинаби гьечIолъиялъ, унтаразухъе жиндир заманалда кумек щоларого захIмалъабиги дандчIвалаан. Пандемиялъул заманалда ДРялъул Сахлъи цIуниялъул министерствоялъ 14 медицинаялъул гIуцIиялъе хехаб кумекалъул автомашинаби росунги рукIана.
Нилъер республикаялда гуребги, хехаб кумекалъул машинаби гIолел гьечIо улкаялъулго цогидал регионаздаги. Гьелда бан, РФялъул президент Путинил бихьизабиялда рекъон, 2021-2024 соназда жаниб улкаялъулго медицинаялъул гIуцIабазе хехаб кумекалъул 5000 автомашина босулеб буго. Хасго кIвар кьолеб буго рикIкIадал мугIрул росабалъе хехаб кумекалъул автомашинаби щвезариялде.
2025 соналде щвезегIан сахлъи цIуниялъул тIоцебесеб кумекалъе (первичное звено) 6,5 миллиард гъурущ биччазе хIисабалде босун буго. Гьеб заманалда жаниб 700-гIанасеб автомашина босизе буго медицинаялъул гIуцIабазе.
Дагьал церегIан къоязда, Дагъистаналъул районазул ва шагьаразул больницабазеги кьуна хехаб кумекалъул ва тохтурзабазул хъулухъ тIубалеб 27 машина. «ДРялъул сахлъи цIуниялъул тIоцебесеб звено жакъасеб къоялъул тIалабазда рекъон бачин» абураб программаялда рекъон, республикаялъул сахлъи цIуниялъул идарабазе автотранспорт кьеялъул тадбиралда гIахьаллъана Дагъистаналъул бетIер Сергей Меликовги.
Районазул ва шагьаразул больницабазе 13 «Газель», 10 «Нива» ва 4 «Лада Ларгус» автомашинаби кьуна.
Унтарал больницабазде щвезаризеги, унтаразухъе раккизе унел тохтурзаби рекIинеги, цIех-рехазе росулел биоматериалал яги дараби раччизеги хIажатал автомашинабаздалъун хьезаризе ругин медицинаялъул гIуцIабиян лъазабуна ДРялъул сахлъи цIуниялъул министр Татьяна Беляевалъ. 2021 соналда медицинаялъул гIуцIабазе кьезе буго 177 автомашина.
Министралъул рагIабазда рекъон, республикаялда сахлъи цIуниялъул тIоцебесеб бутIа цIигьабиялъул мурадалда МахIачхъалаялъул Ленинкент поселокалда ва Сепараторазул поселокалда базе буго 250 чиясе хъулухъ гьабизе рес бугеб кIиго поликлиникаги.
ПатIимат СУЛТIАНМУХIАМАДОВА
