11 сентябралда, МахIачхъалаялда тIобитIана росдал магIишаталъул иргадулаб ярмарка. МоцIалъ цебе, 14 августалда гьебго бакIалда тIобитIаралда данде гьеб ана гIемерго тIадегIанаб даражаялда, республикаялъул киналго районаздаса 200-гIанасев магIишатчи гIахьаллъун. Гьаб нухалда гIемерго цIикIкIун букIана нигIматазул къадарги, хасго пихъил, гьанал, ччугIил. Гьезул цо-цоязул багьаби базаразда ругел хIисабалъул рукIаниги, гIемерисел рукIана 10-20 проценталъ учузал.
Ярмаркаялда гIахьаллъана ва киналъулго хIисаб-суал гьабуна ДРялъул хIукуматалъул председателасул заместитель ГIабдулмуслим ГIабдулмуслимовас, росдал магIишаталъул ва кванил нигIматазул министр БатIал БатIаловас ва республикаялъулгун тахшагьаралъул идарабазул жавабиял хIалтIухъабаз.
