Гумбет районалъул росабалъе газ бачиналъул тадбирал гьарулел руго «Газпром газораспределение Дагестан» идараялъул махщелчагIаз.
Проект гIумруялде бахъинабуна РФялъул регионазде газ бачиналъул программаялда рекъон. Гьелъие гIарац кьуна «Газпром» ПАОялъ. Проект хIадурана ва рогIрал рачиналъул хIалтIи гIуцIана «Газпром межрегионгаз» ОООялъ. Техникияв заказчиклъун ккола «Газпром инвест» ОООялъул вакиллъун бугеб «Газпром газификация» абураб филиал.
«Газ биччазе буго гьеб къабул гьабизе гIадамазул хIадурлъи гьабун бахъараб мехалда», -ян бицана «Газпром газораспределение Дагестан» ОООялъул исполнительный директор Ризван ГъазимухIамадовас.
