Каспий ралъад чорок гьабиялъул гIайиб Дербенталъул чогъролгун коньякалъул заводалда бугин абуна гьеб шагьаралъул нухмалъиялъ.
Чанго къоялъ цебе социалиял гьиназде рехун бачIана Каспий ралъдалъе рогIороялъусан чвахулеб чорокаб лъим бихьизабураб видеоролик. 5 апрелалда гьелъие жаваб гьабуна Дербенталъул администрациялъ. Гьезул рагIабазда рекъон, чагъир гьабулеб «Дагъистан» абураб комбинаталъ щибаб соналъ биччалеб буго ралъдалъе гьеб чороклъи.
Гьелъул хIакъалъулъги лъазабун, жидеца февралалдаго кагътал ритIанин ДРялъул тIабигIат цIуниялъул рахъалъ прокуратураялдеги, Роспотребнадзор ва Ростехнадзор идарабаздеги, амма гьез кинал рукIаниги тадбирал гьаричIин лъазабуна Дербенталъул администрациялъ.
Ашахан ЮСУПОВ
