FaceBook  in  yt  rss

Россия бахилаб бергьенлъи щвана Россия бахилаб бергьенлъи щвана

Гьал къоязда рагIалде бахъараб эркенаб гугариялъул рахъалъ Россиялъул чемпионат тIобитIана Москва областалъул Наро-Фоминск шагьаралъул спортивияб кIалгIаялда. Къецазул тIоцебесеб къоялъ ургуялде
рахъунезда гъорлъ бищунго гIемер рукIана нилъер ракьцоял. Цо-цо мехалъ, битIахъе, эркенаб гугариялъул рахъалъ Дагъистаналъул чемпионат унеб бугинцин кколеб букIана Наро-Фоминскалда.

Россия бахилаб бергьенлъи щвана

 

Бищунго тIадагьаб цIайиялда (57 кг) бачIинахъего тIоцебесеб бакIги босана ни­лъер ракьцояс. Финалалда Заур Угуевас къезавуна Москва областалъул рахъалдасан цеве вахъарав Азамат Тускаев. Гьебго цIайиялда лъабабилеб бакIалъе мустахIикълъана дагъистанияв - АхIмад Идрисов.
61 кг цIайиялдаги бергьенлъиги призалъулал бакIалги росана Дагъистаналдаса спортсменаз. ТIоцебесеб бакI щвана ГIабасхIажи МухIамадовасе, кIиабилеб бакI - Рамазан Ферзалиевасе ва лъаб­абилелда гIей гьабуна Ибрагьим ГIабдурахIмановас.
65 кг цIайиялда меседил медаль республикаялде бачIиналда щаклъиго букIинчIо. Щайгурелъул гьеб категориялда Россиялъул тIаса бищараб командаялъул церехъабилъун рикIкIунелъул ХIажимурад Рашидовгун АхIмад Чакаев. Гьев кIиявго ворчIана финалалде, амма бергьенлъи босана ХIажимурад Рашидовас. Гьебго цIайиялда лъабабилеб бакIалъе мустахIикълъана цоги нилъер ракьцояв Загьир Шахиев.
КIиабилеб къоялъ тIоцере ургуялде рахъана 70 кг цIайиялда гугарулел спортсменал. Хьул букIана гьеб категориялдаги гIолохъанав речIчIухъан Къурбан Шираевас данде вахъа-вахъарав къезавилин. Гьедин кколебги букIана Ханты-Мансийскиялъул тIаса бищараб командаялъул гугарухъан Давид Баевгун речIчIизегIан. Къурбан гьесукьа къуна 8:0 хIисабгун. Кин букIаниги, чемпионаталда мазгарул медалалъе мустахIикълъана гьев.
Хадур ургуялде рахъана 74 кг цIайиялда гугарулел спортсменал. Гьелъул бащдаб финалалда дагъистанияв МухIамад КъурбангIалиев данд чIвана Северияб Осетия-Алания республикаялдаса Хетиг Цаболовгун. Гьениб чIел босана асатIинас. Финалалда Цаболовасдаса рецIел босана нилъер ракьцояв Разамбек Жамаловас. 5:1 хIисабгун къезавуна нилъерас гьев.
79 кг цIайиялдаги меседил медалалъе мустахIикълъана Дагъистаналдаса гугарухъан АхIмад ГIусманов. Финалалда гьес къезавуна Брянск областалъул рахъалъ цеве вахъунев ХIажимурад ГIалихIмаев. Гьебго цIайиялъул категориялда лъабабилел бакIал щвана нилъер речIчIухъаби ХIажи Набиевасегун Аманула ХIажимухIамадовасе.
86 кг цIайиялдаги чIел босана ракьцояв Даурен Куруглиевас. Финалияб къеркьеялда гьес къезавуна Ханты-Мансийскиялъул командаялъул речIчIухъан Артур Найфонов. Гьебго цIайиялда лъабабилеб бакI ккуна дагъистанияв АрсенгIали Мусал­гIалиевас.
92 кг цIайиялдаги тIоцебесебгун кIиабилеб бакIазе мустахIикълъана дагъистаниял ГIалихан ЖабрагIи­ловгун МухIамад Къурбанов.
97 кг цIайиялда тIоцебесеб бакI ГIабдурашид Садулаевас кколеблъиялда щаклъиго букIинчIо. Финалалда гьес къезавуна Северияб Осетия-Аланиялдаса Асланбек Сотиев.
Бищунго бакIаб 125 кг цIайиялъул категориялда финал букIана кутакалда хIалуцараб. Гьелда дагъистанияв Шамил Шарипов данд чIвана Северияб Осетия-Алания республикаялдаса Алан Хугаевгун. Къеркьеялъул ахиралда Аланица прием гьабулелъул, контрприемги гьабун, Шамилие кьезе кколел рукIарал баллал судияз рикIкIинчIо, ва гьеб сабаблъун ахIи-хIур бахъана. Амма лъидаго кIвечIо судиял кантIизаризе ва гьезул кумекалдалъун Хугаев бергьана.
Наро-Фоминскиялдаса Дагъистаналъул команда тIад буссана микьго меседил, щуго гIарцул ва микьго мазгарул медалалгун. Гьединал хIасилал цереккун Россиялъул чемпионаталда цониги регионалъул тIаса бищараб командаялъ рихьизарун рукIинчIо. 10 меседил медалалда гьоркьоса микьгояб нилъеразе щвей ккола, унго-унголъунги, цогидал командабазда тIад «михир» бачин. ГьанжелъизегIан рекорд букIана анкьго меседил медаль. Гьебги букIана Дагъистаналъул командаялъ чIезабураб.
Чемпионаталде унелъул спортсменазда цебе лъураб масъала бищун дагьаб лъабго-ункъо меседил медаль боси букIанин бицана нижее республикаялъул тIаса бищараб командаялъул тренер ХIайдар ХIайдаровас.
- Командаялда цере тренеразул штабалъ лъола тIуразаризе захIматал масъалаби. Спортсменазда лъала ва бичIчIула, жидеде бугеб божилъи цо нухалъ хвезабуни, кIиабизе гьеб тIад буссунареблъи. Олимпиялъул хIаял гIагарлъулел рукIиналда банги батила, кутакаб гъира-шавкъгун гугарана нилъер спортсменал, - ян бицана гьес.

- Кинабго лъикI букIинаан чемпионаталъул ахиралда дагIба-къец ккечIебани. Шамил Шари­повасдагун Алан Хугаевасда гьо­р­кьоб букIараб къеркьеялдаса ха­дуб ахIи-хIур бахъана спортивияб кIал­гIаялда. Щиб гьениб ккараб?
- БитIараб бицани, нилъер командаялъе чемпионаталда щвезе кколаан, микьго гуреб, ичIго меседил медаль. 125 кг цIайиялда цеве вахъарав Шамил Шарипов Алан Хугаевасдаса бергьана. Осетинас прием гьабулелъул гьев мугъаб рахъалъ чIарбиде ккезавуна нилъерас. Амма судияз гьелъухъ Шамилие мустахIикъаб балл кьечIо. Нижеда цадахъ чемпионаталде вачIун вукIарав ДРялъул гугариялъул федерациялъул вице-президент, Олимпиялъул категориялъул судияв ГIубайдула ГIусмановас чIезабуна баллал мекъи кьун рукIин. Амма Хугаевасул квер борхун букIиналда бан, хIасил хисизабун бажаричIо.

- Дагъистаналъул тIаса бищараб командаялъул мухъилъ кунчIана цIиял цIарал. Гьеб рахъалъ щиб абилеб?
- Разамбек Жамалов, АхIмад ГIусманов, ГIалихан ЖабрагIилов, Шамил Шарипов - гьел спортсменазул цIарал гIемеразда рагIун рукIун ратиларо. Амма нижеда лъалеб ва бичIчIулеб букIана рехсарал гугарухъаби дагь-дагьккун жидерго цIайиязул категориязда цебесеб кьерда рукIине ругеблъи. ЛъикI гугарана 65 кг цIайиялда цеве вахъунев Загьир Шахиевги. Гьес финалалъул ункъил бутIаялда къезавуна Олимпиялъул чемпион Сослан Рамонов.

- Ахираб чанго соналъ 86 кг цIайиялда абизегIанасел хIасилал рукIинчIо нилъер спортсменазул. Гьаб чемпионаталдайин абуни, гьеб цIайиялда цере рахъунел бищунго къуватал речIчIухъабиги къезарун, Даурен Куруглиев вахъана чемпионлъун. Гьесул гугариялъе кинаб къимат кьолеб?
- Даурен вуго къуватав гугарухъан. Амма, ахираб заманалда, чIахIиял турниразда гьесда цебе эхетараб къедлъун вукIана Артур Найфонов. Гьаб нухалъ бажарана Куруглиевасухъа гьеб къед биххизабун. Физическияб рахъалъ лъикIго хIадурлъани, гьесде вахарав спортсмен 86 кг цIайиялда вукIине ресго гьечIо.

- ГIабдурашид Садулаевасул рахъалъ щиб абилеб? Финалалда гугарулаго гьев дагьалъ сваканин кколеб букIана.
- Финалалда ялъуни цогидаб къеркьеялда ГIабдурашид свакачIо. Гьев гугарулев вукIана цIуна-къайги гьабун, къеркьолаго сакъатал ккезе ресалги рукIунелъулха. Садулаев цеве вахъунелъул, гьев къезеги бегьулин абураб пикру ботIролъе бачIинего бачIунаро. Щайгурелъул гьев гугарула кинабгоги хIисабалде босун. Гьаб нухалдаги ГIабдурашидица бихьизабуна жив командаялъул унго-унгояв цевехъан вукIин.

- Россиялъул чемпионаталда бер­гьарал киналго гугарухъаби гIахьаллъизе ругищ дунялалъул чемпионаталда?
- Гьеб суалалъе жаваб кьезе кIо­ларо. Коронавирусалда сверухъ бугеб ахIвал-хIалалда бан гьеб тIобитIизе бугищалицин лъала­ро. Амма киналго Россиялъул чем­пионал гьенир цере рахъине мус­та­хIикъал руго.

- МухIамадрасул ГъазимухIа­ма­довасулгун МухIамад Къурбан­гIа­лиевасул церерахъиназе кинаб къимат кьолеб дуца?
- МухIамадрасул вуго физическияб рахъалъ къуватав спортсмен. Дагьав цеве гьев унтун вукIана ва, дир хIисабалда, гьесул черхол хIал жеги тIубан рукIалиде бачIун гьечIо. Гьеб букIана гьесул загIипаб цеве вахъиналъе гIиллаги.
МухIамад КъурбангIалиев чемпионаталда гугарана лъикI. Финала­лъул бащдаб бутIаялда Хетаг Цаболовасдаса гьев къеялъе гIиллалъун ккана судиязул гъалатIал. Лъабабилеб бакIалъе гIоло гъира-шавкъго гьечIого гугарана МухIамад ва къуна.

- Къурбан Шираев гугарулев вукIана лъикI. Амма финалалъул ункъил бутIаялда Давид Баевгун къеркьана цIакъ загIипго…
- Къурбан ккола гIолохъанав гугарухъан. Цо-цо турниразда бергьаниги, гьесул кIудияб хIалбихьи гьечIо. Гьелде тIадеги, Шираев цеве вахъана цIияб цIайиялъул категориялда. Гьеле, дир хIисабалда, хIалбихьи бугев Давид Баевасдаса гьев къеялъе гIилла. Амма ракIчIола хадурккун гьес бергьенлъаби росизе рукIиналда.

Прочитано 60 раз

Оставить комментарий

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.

 

ХIакъикъаТ 

Республиканская общественно-политическая газета на аварском языке.

 

Исполняющий обязанности главного редактора:

Умахан Амирханович Умаханов

_____________________________

 

f1  in1  yt1  rss1

_____________________________

 

Рейтинг@Mail.ru

Яндекс.Метрика

 

СМИ

Учредитель сетевого издания ГБУ РД "Редакция республиканской газеты "Истина".
Зарегистрирован Федеральной службой по надзору в сфере связи , информационных технологий и массовых коммуникаций .
vozrastСвидетельство о регистрации средства массовой информации Эл № ФС77-73996 от 19 октября 2018 года.

 

 

Фото

Настройка сайта

Цвет темы

Cyan Red Green Oranges Teal

Макет

Шир. Рам. Обрамл. Округл.
Изменение фонового рисунка
Вверх