Гьал къоязда МахIачхъалаялдаги Буйнакскиялдаги гьоркьоб бугеб Атлибуюналъул свералабазда аскIоб тIобитIана, вузазул спортивияб фестиваль. Гьел къецал тIоритIиялъул аслияб мурад букIана сахлъи щула гьабулеб къагIидаялъ гIумру тIамизе, спорталъулгун гIадамаз бухьен щула гьаби ва гIолилал гъункизари.
Къецал тIоритIана гьал хадур рехсарал спортивиял тайпабазда гьоркьор:
- Гиря рехи.
- Гиря борхи.
- Турникалда цIай.
- 1000 метралъ рекери.
- ЧIараб бакIалдаса кIанцIи.
- Квар цIай.
Фестивалалъул хIурматиял гьалбаллъун рукIана: эркенаб гугариялъул рахъалъ Олимпиялъул чемпион Сайпула Абсаидов, квержубараб рагъул рахъалъ дунялалъул чемпион МухIамадхан ХIамзатханов (Волк-Хан), тIада- гьаб атлетикаялъул рахъалъ халкъазда гьоркьосел къецазул чемпион ХIайбула Арбулиев, ушу- саньдаялъул рахъалъ дунялалъул чемпион Мурад Ахадов, квержубараб рагъул рахъалъ дунялалъул чемпион МухIамад ЖабрагIилов, ММАялъул рахъалъ дунялалъул чемпион Мурад ГIабдулаев ва цогидалги. Гьединго, гьенире рачIун рукIана республикаялда ругел спортшколазул тренералги ва машгьурал спортсменалги.
Къецазул аслияв судиявлъун вукIана Атай ЖабрагIилов.
Лъималазул командаялда гьоркьоб 1-себ бакI ккуна «Лидер» спортшколалъ. Квар цIаялъул къецазда дандчIвана кIиго къуватаб команда: МухIамадхан ХIамзатхановасулги ХIайбула Арбулиевасулги тIаса рищарал спортсменазул кIиго къокъа. ХIалуцарал къецазда бергьана «Волк-Ханил» команда.
Гиря рехун 1-себ бакI ккуна ТIагьир ГIалиевас. Гиря борхун бергьана Шамил Таймасханов. Рекерун, кIанцIун ва турникалда цIан бергьана «Лидер» спортшколалъул вакилзаби.
ЧIор рикIкIаде рехиялъул рахъалъ мастер-класс бихьизабуна ХIайбула Арбулиевас.
Гьединго, гьес бицана тренер Атай ЖабрагIиловасул нухмалъиялда гъоркь, сентябрь моцIалда, Сочиялда тIобитIизе бугеб чемпионаталда гIахьаллъизе хIадурулев вукIиналъулги.
Аллагьас хъван батани, 32-абилеб нухалъги чемпионлъун вахъине къасд бугин абуна ХIайбулаца.
— ГьабсагIаталда дун хIалтIулев вуго имам Шамилил цIар кьураб, Северияб Кавказалъул гуманитарияб колледжалда, — ян бицана гьес «ХIакъикъаталъе». — Газета гьоркьобккун баркала кьезе бокьун буго колледж гIуцIарав Тавлу Казакбиевасе ва Жавид ХIажиахIмадовасе. Щибаб нухалда республика бахун къватIир тIоритIулел къецазде дун нухарегIизеги, тIад вуссунелъул дандчIвай гьабизеги рачIуна гьел кIиялго. Гьединго, гIарцул рахъалдасан кумекги гьабула гьез.
Гьал къоязда ХIайбулагьил гIумруялъул тIубана 71 сон. «ХIакъикъат» газеталъул коллективалъ баркула гьесда гьавураб къо ва гьарула бергьенлъабиги, гIолеб гIелалъе мисалияб куцалда сахаб гIумру тIамизе тавпикъги.