Газеталъул цересел номеразда кьун букIана гугариялъул рахъалъ 2020 соналъул Россиялъул чемпионат Москваялда букIине бугин. Гьал къоязда РФялъул гугариялъул Федераци­ялъул вице-президент Арсен Фадзаевас лъазабуна гьеб улка­ялъул тахшагьаралдаса Владикавказалде бахъулеб бугин.

«Нижеца хIукму гьабуна гу­гариялъул рахъалъ Россиялъул чемпионат Северияб Осетия- Аланиялда тIобитIизе. Гьелда сверухъ улкаялъул гугариялъ­ул Федерациялъул президент Михаил Мимиашвилидагун Северияб Осетия-Алания ре­спубликаялъул бетIер Вячес­лав Битаровасда гьоркьоб гара- чIвари букIана ва рачIана цо пикруялде. Бокьараб спорти­вияб тадбир лъикIаб даражаял­да тIобитIизе киналго шартIал руго гьенир. Чемпионат букIине буго 9-11 октябралда. РакIчIола исанасеб чемпионат хIалуцараб, цересел турнираздасаги лъикIаб, тIокIаб къагIидаялда ине букIиналда. Гьелъие нижеца кIвараб яхIги бахъизе буго», - ян абуна А. Фадзаевас.