FaceBook  in  yt  rss

11

Эркенаб гугари

ХIалбихьиял рукIина

 

Россиялъул тIасабищараб командаялда гъорлъ Европаялъул чемпионаталда
церерахъине ругел спортсменазул сияхI тасдикъ гьабун гьечIо

КIиго анкьалъ цебе Красноярскалда Иван Ярыгинги ракIалдещвезавун тIобитIараб эркенаб гугариялъул рахъалъ халкъазда гьоркьосеб турниралда Дагъистаналъул тIасабищараб командаялъ ккуна тIоцебесеб бакI. Анкьго меседил ва ункъо гIарцул медалал щвана нилъер гугарухъабазе. Амма рехсараб турниралда бергьанщинав спортсмен Каспийскалда букIине бугеб эркенаб гугариялъул рахъалъ Европаялъул чемпионаталда гIахьаллъичIого вукIинеги бегьула. Гьедин лъазабуна рехсараб спортивияб тайпаялъул рахъалъ Россиялъул тIасабищараб командаялъул тренер Дзамболат Тедеевас. «Иван Ярыгин» Гран-приялда цо-цо речIчIиял рукIана хIалбащадал. Мисалалъе, ХIажимурад Рашидовасда ва ИсмагIил Мусукаевасда гьоркьоб. Европаялъул чемпионаталда цебе гьев кIиясдаго ва цоги спортсменазда гьоркьор рукIине руго къеркьеял. Гьелдаса хадуб лъала Дагъистаналда букIине бугеб Европаялъул чемпионаталда гIахьаллъизесел спортсменазул цIаралги.
Дагъистаналъул тIасабищараб командаялъул тренер Сажид Сажидовасул рагIабазда рекъон, Европаялъул чемпионаталда гIахьаллъизе ккола Ярыгинил турниралда бергьарал киналго спортсменал. «ГIицIго Красноярскалда гурелги, гIахьаллъи гьабунщинал турниразда рихьизаруна гьез лъикIал хIасилал. Ярыгинил Гран-приялда анкьго дагъистанияв бергьун вукIиналъ рицунел харбал руго гьел Дзамболат Тедеевас», - ан абуна Сажидовас.
- Ярыгинил турниралда Дагъистаналъул тIасабищараб командаялъ рихьизарурал хIасилаздаса рази вугищ мун?
- Анкьго тIоцебесеб бакI - гьеб цIакъ лъикIаб хIасил ккола. Амма гьениб щибгIаги гIажаиблъизе ялъуни рохизе ккараб жо гьечIо. Гьелде ниж хIадурлъун рукIана ва ракIалда букIана жеги цIикIкIун медалал росизе. Мисалалъе, 86 кг цIайиялдаги кIолаан лъикIал хIасилал рихьизаризе. Рехсараб категориялда цеве вахъунев Даурен Куруглиев вуго къуватав гугарухъан, амма чIахIиял турниразда цеве вахъине захIмалъулеб буго гьесие. Гьелда тIад хIалтIизе ккола. Дир хIисабалда, гьеб цIайиялда Россиялъул тIасабищараб командаялда гъорлъ Европаялъул чемпионаталда гIахьаллъизе ккола Аланиялдаса Артур Найфонов. Гьев вуго гIолохъанав гугарухъан ва рес кьезе ккола гьесие чIахIиял турниразда цеве вахъине, хIалбихьи щвезе.
- Лъил цевевахъин бищунго бокьараб?
- Щивав спортсменасул бажари-гьунар дида цIакъ лъикI лъала ва, кинаб къагIидаялда гьел церерахъаниги, кинал хIасилал рихьизаруниги, бокьарав тренерасул бер гIорцIуларо, кидаго батула гIайибчIвазе бакI. Абизе ккола, спортсменазул тIад хIалтIизе кколел, загIипал рахъал гIемер рихьана ва лъана. Бищунго бокьана 97 кг цIайиялда цеве вахъарав Расул МухIамадовас бихьизабураб гугари, хасго Олимпиялъул чемпион Снейдерида данде гьев къеркьараб куц.
- Киналго балагьун чIун рукIана «Иван Ярыгин» Гран-приялда ГIабдурашид Садулаевасда ва Кайл Снейдерида гьоркьоб букIине кколеб букIараб речIчIиялъухъ. Лъица ГIабдурашид 92 кг цIайиялде вачIине гьесизавурав?
- ГIабдурашид Садулаевасе бокьун букIана Кайл Снейдергун гугаризе ва рецIел босизе. Амма гьесие 97 кг цIайиялда цевевахъине жегиги заман щун гьечIо. Щайгурелъул гьесул унго-унгояб цIайи 93 кг гурого гьечIелъул. 97 кг цIайиялъул категориялда гугарулел спортсменаз турниразде хIадурлъулаго бищун дагьаб тIаса рехула 10-15 кг ва гьезул къуватги жанги цIунун хутIула. ГIабдурашид Садулаевасул къаркъалаги гьездаса гьитIинаб буго. 97 килограммалда цевевахъине ккани, гьев ви­цца­лъи­зе, ччорбазда тIад хIалтIизе ккола.

Спорталъул кIиго цIва
ХIабиб НурмухIамадов - «Реал Мадрид»
командаялъухъ гьоболлъухъ

Жубараб речIчIухъанлъиялъул рахъалъ UFC гIуцIиялъул турниразда цевевахъунев дагъистанияв ХIабиб НурмухIамадов гьал къоязда Испаниялъул «Реал Мадрид» футболалъул клубалъ ахIун щвана «Реал Сосьедад» командаялъулгун букIараб хIаялъухъ балагьизе. Гьебин абуни тIобитIана Испаниялъул тахшагьар Мадридалда. ХIалуцараб хIаялъул хIасил ккана 5:2. Бергьана «Реал Мадрид». ХIаялдаса хадуб дандиязул кавабахъе лъабго гол кьабурав «Реалалъул» гьужумалъулав Криштиану Роналдугун дандчIвана ХIабиб НурмухIамадов. КIиявго цIар рагIарав спортсменас цоцазе гьаруна сайгъатал. ХIабибица Криштиануе кьуна тIагъур ва жиндирго цIар тIад хъвараб футболка. Криштиануцаги нилъерасе сайгъа­т гьабуна ахирисеб хIаялда тIад букIараб футболка ва торгIо. Испаниялдаса ХIабиб НурмухIамадов ине вуго Америкаялъул Цолъарал Штатазде, 7 апрелалда UFCялъул рачелалъе гIоло Тони Фергюсонилгун букIине бугеб къеркьеялде хIадурлъизе.

Прочитано 376 раз Последнее изменение Пятница, 16 февраля 2018 06:41

Оставить комментарий

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.

 

ХIакъикъаТ 

Республиканская общественно-политическая газета на аварском языке.

 

Руководитель-главный редактор:

Камалов Али Ахмедович

_____________________________

 

f1  in1  yt1  rss1

_____________________________

 

Рейтинг@Mail.ru

Яндекс.Метрика

 

Фото

Настройка сайта

Цвет темы

Cyan Red Green Oranges Teal

Макет

Шир. Рам. Обрамл. Округл.
Изменение фонового рисунка
Вверх