FaceBook  in  yt  rss

Байрахъ - Олимпиадаялъул, спортсменал - Россиялъул

Россиялдаса Югалъулаб Кореялде ине вуго 168 спортсмен

 

18 соналъул хасалил Олимпиада. Гьениб гIахьаллъизе буго 92 пачалихъалъул команда, гьездаго гъорлъ Россиялъулги. Амма нилъер команда цебе бахъине буго Олимпиялъул байрахъалда гъоркь. Гьелъи­е гIиллалъун халкъазда гьоркьосеб Олимпиялъул комитеталъ (МОК) бихьизабуна Россиялъул тIасабищараб командаялъул гIемерисел спорт­сменаз Сочиялъул Олимпиа­даялда допинг хIалтIизаби. Гьеб гьедин букIанин дунялалъулго допингалда дандечIараб комитеталъул комиссиялда цебе нугIлъи гьабуна 2006-2015 соназда РФялъул «Допингалда дандечIеялъул центр» ФГУПалъул директорлъун хIалтIулев вукIарав Григорий Родченковасги.

Пачалихъалъул спортсменазул Олимпиадаялда гIахьаллъизе рукIарал хьулалги хIорлъизарун, гьев лъутана Америкаялъул Цолъарал Штатазде. 2017 соналъул 13 сентябралда 17 пачалихъалъул допингалда дандечIараб комитетазул вакилзабаз лъазабуна Россия Олимпиялъул хIаязде биччазе бегьуларин, хадуб гьединазул къадар бахана 28-ялде. Гьебго соналъул щуабилеб декабралда МОКалъ хIукму къотIана Россиялъул команда Олимпиадаялде гьукъизе, гьездаго цадахъ РФялъул Спорталъул министерствоялъул хIалтIухъабиги. Гьал къояздайин абуни, Лозанналда бугеб Спорталъул арбитражалъул судалъ лъазабуна Россиялъул команда Пхенчханалъул Олимпиадаялда гIахьаллъизе биччазе бугин, амма спортсменазда сверухъ хасал тIалабалги рукIине ругин. Мисалалъе, Олимпиадаялъул заманалда нилъеразе гьукъун буго Россиялъул байрахъ, герб ва цогидал игIланал тIад ругеб ретIел ретIине. Гьел цере рахъине ккола Олимпиялъул байрахъалда гъоркь. ХIатта абулеб букIана Россиялъул байрахъ нилъер пачалихъалъул командаялъул рахъкквезе Югалъулаб Кореялде ине ругел гIадамазухъгицин букIине бегьиларин. Амма хадуб МОКалъ улкаялъул тIасабищараб командаялъул рахъкколездаса гьединал тIалабал тIаса росана. ПалхIасил, Пхенчханалде Россиялъул тIасабищараб командаялда гъорлъ ине вуго 168 спортсмен. Гьезда гьоркьор рукIине гьечIо ритIухъ гьаруниги допингалда сверухъ букIараб ахIи-хIуралъул гIахьалчагIи. Сочиялъу­л Олимпиадаялъул призеразул ва чемпионазул, ай 28 спортсменасул медалал тIадруссинаруна МОКалъ. 11 спортсменасда сверухъ хIалтIи гьабулеб буго ва гьезиеги ихтияр кьуна хадурккунисел Олимпиялъул хIаязда гIахьаллъизе.
Югалъулаб Кореялда рукIине ругел Олимпиялъул хIаязде ине гьечIел спорсменазул рахъккун митинг тIобитIана гьал къоязда Дагъистаналъул тахшагьар МахIачхъалаялдаги. Гьелда гIахьаллъи гьабуна 3000-ялдасаги цIикIкIун чияс.

Ихдалил бутIаялде хIадурлъулаго
Станислав Черчесов щвана Турциялда бугеб
«Анжи» командаялъухъе гьоболлъухъ

Футболалъул рахъалъ Россиялъул тIасабищараб командаялъул бетIерав тренер Станислав Черчесов щвана сборазда Турциялда бугеб «Анжиялъул» тренировкабазде. ГIезегIан заманалъ футболистазда хадуб халги ккун, Черчесовас гара-чIвари гьабуна МахIачхъалаялъул командаялъул тренер Вадим Скрипченколгун ва спортивияв директор Александр Танцюролгун. Россиялъул тIасабищараб командаялъул тренерас гьезда бицана жинца хадуб халккурал футболистазул ва гьезда сверухъ хIалтIизе кколеб къагIидаялъул.
Гьелдаса хадуб 2017-2018 соназул чемпионаталъул ихдалилаб бутIаялде хIадурлъулаго, «Анжи» хIана Казахстаналъул «Тобол» командагун ва бергьана 1:0 хIисабгун. Гол кьабуна гьужумалъулав Хуан Лесканоца. ТIоцебесеб таймалда хIана аслияб командаялда гъорлъе унелги унарелги футболистал. КIиабилеб таймалда майданалде риччана бищунго къуватал. ХIаялъе къимат кьолаго, гьадин абуна «Анжиялъул» бетIерав тренер Вадим Скрипченкоца: «ТIоцебесеб таймалда гьужумал гьарулелъул, футболистазе тирилъи гIолеб букIинчIо, цIакъго гIодоре риччан хIалел рукIана. Амма защитаялда хIараб къагIидаялдаса разияв вуго. Хасалил бутIаялда гьеб букIана командаялъул загIипаб рахъ. Гьелъ бицуна ниж битIараб нухда рукIиналъул. КIиабилеб таймалда командаялъул мухъилъ гьарурал хиса-басияз хIасил кьуна», - ян.

Хадусеб къеркьеялде ахириселде гIадин
Дагъистаналдаса речIчIухъаби хIадурлъулел руго иргадулал церерахъиназде

Жубараб речIчIухъанлъиялъул рахъалъ UFC компаниялъ тIоритIулел турниразда цере рахъунел дагъистаниял Рамазан Эмеевасдагун МухIамад Бибулатовасда лъана хадусел къеркьеязда жидеда данде рахъине ругел спортсменазул цIарал. Гьоркьохъеб цIайиялда М-I Challenge гIуцIиялъул экс-чемпион гIахьаллъизе вуго 12 маялда Рио-де-Жанейроялда букIине бугеб турниралда ва дандчIвазе вуго бразилиялъулав Альберто Минагун. Гьевин абуни тIатIала бергьун вукIана ахираб 30 къеркьеялда. Амма хIатIие сакъат ккун букIиналда бан, ахираб кIиго соналъ гьев рингалде вахъун вукIинчIо. Рамазан Эмеевасулин абуни Америкаялъул промоушеналда кIиабилеб къеркьей ккола гьеб. ТIоцебесеб нухалъ гьев бергьун вукIана Сэм Алвидаса. Дагъистаниясул рагIабазда рекъон, Мина вуго къуватав спортсмен ва, гьесда тIад бергьенлъи босизе кIвани, UFCялъул бищунго къуватав 15 спортсменасул сияхIалда гъорлъе ккезе рес буго гьесул цIар.
МухIамад Бибулатов цеве вахъине вуго Америкаялъул Цолъарал Штатазул Атлантик-Сити шагьаралда ва дандчIвазе вуго Япониялдаса Юта Сасакигун. Цебехун рехсараб промоушеналъ тIобитIараб кIиго турниралда гIахьаллъана МухIамад, тIоцебеселда бергьана ва кIиабилеб нухалъ къуна. Гьесда данде вахъине вугев япониялъулав ахирисеб къеркьеялда къун вукIана Жуссеру да Сильвадаса.

Прочитано 76 раз Последнее изменение Пятница, 09 февраля 2018 07:53
hakikat

Эл. почта Этот адрес электронной почты защищён от спам-ботов. У вас должен быть включен JavaScript для просмотра.

Оставить комментарий

Убедитесь, что Вы ввели всю требуемую информацию, в поля, помеченные звёздочкой (*). HTML код не допустим.

 

ХIакъикъаТ 

Республиканская общественно-политическая газета на аварском языке.

 

Руководитель-главный редактор:

Камалов Али Ахмедович

_____________________________

 

f1  in1  yt1  rss1

_____________________________

 

Рейтинг@Mail.ru

Яндекс.Метрика

 

Фото

Настройка сайта

Цвет темы

Cyan Red Green Oranges Teal

Макет

Шир. Рам. Обрамл. Округл.
Изменение фонового рисунка
Вверх