Бащдаб лъагIел хутIун буго Токиоялда Олимпиялъул хIаял тIоритIизе. Эркенаб гугариялъул рахъалъ Россиялъул тIаса бищараб командаялъул мухъилъ гьенире ине ругел спортсменазул цIарал тренераз жеги рехсечIо.

 

Амма ракIчIун абизе кIола гьеб сияхIалда ГIабдулрашид Садулаевасул цIар букIине бугилан, щайгурелъул гьев ахирал соназда гIахьаллъаралщинал турниразда бергьана. Гьединго Олимпиялъул хIаязде унезул сияхIалде ккезе бегьула Заур Угуев, ХIажимурад Рашидов, Заурбек Сидаков ва Артур Найфонов. Олимпиадаялда гIахьаллъизе бегьула 65 кг цIайиялда цеве вахъунев Къурбан Шираевги.
Гьал къоязда wrestdag.ru сайталъ гIуцIараб рейтингалдаги тIоцебесеб бакIалде вачIана Хасавюрталдаса гьев спортсмен. Рехсараб сайталъул экспертаз хIисабалде росун руго рейтингалъул сияхIалде ккарал спортсменаз батIи-батIиял турниразда рихьизарурал хIасилал.
Дагьаб цебе Иван Ярыгинил мемориалалда 2016 соналъул Олимпиялъул чемпион Сослан Рамоновги къезавун, ворчIана гьев Европаялъул чемпионаталде. Гьелъул финалалда, 5:0 хIисабгун Белоруссиялдаса спортсмен Нюргун Скрябинги къезавун, дагъистанияв мустахIикълъана меседил медалалъеги.
Гьебго рейтингалъул кIиабилеб ва лъабабилеб бакIазда руго 2020 соналъул Европаялъул чемпионаталъул гIарцул призер МухIамадрасул ГъазимухIамадов ва мазгарул медалалъе мустахIикълъарав МухIамад Рамазанов.