Дунялалдаго машгьураб Sherdog абураб интернет-порталалъул рейтингалда тIоцебесеб бакIалде вачIана Дагъистаналдаса речIчIухъан ХIабиб НурмухIамадов. Гьебгиха, цIайиязул категориязухъ балагьичIого.
ЦIияб рейтингалда рекъон, гьелде щвезегIан тIоцебесеб бакIалда вукIарав Америкаялъул Цолъарал Штатаздаса спортсмен Жон Жонс вачIана кIиабилелде. Лъабабилеб бакIалда вуго эркенаб гугариялъул рахъалъ Олимпиялъул чемпион, UFCялъул речIчIухъан Генри Сехудо. КватIичIого ХIабиб НурмухIамадовгун дандчIвазе кколев Тони Фергюсон гьеб рейтингалда вуго ичIабилеб бакIалда.
Гьелда бан ГIабдулманап НурмухIамадовас гьадин абуна: «Рейтингал хисула, амма гьабсагIат нижеда цебе чIараб масъала буго гьелда тIоцебесеб бакIалда хутIи.
2003-2008-абилел соназда, цIайиязул категориязухъ балагьичIого, бищунго къуватав спортсменлъун рикIкIунаан Федор Емельяненко. Жакъаги гIемер руго Россиялда гьунар тIокIал, лъикIал спортсменал».
Гьединаллъун гьес рикIкIунел руго Петр Ян, Ислам МахIачев, Забит МухIамадшарипов, МухIамад Анклаев ва Александр Волков. РакIалде кколила гIагараб заманалда гьелги UFCялъул чемпионаллъун рахъинилан.
18 апрелалда Бруклиналда Тони Фергюсонидагун ХIабибида гьоркьоб букIине бугеб къеркьеялъулги гьадин бицана ГIабдулманап НурмухIамадовас:
«Фергюсон вуго къуватав речIчIухъан. Эхетун къеркьезего гIадин, гьесда гугаризеги лъала. БичIчIула гьесухъа 25 минуталъ вагъун бажарулеблъи, гьесул накабаздаса, гIункIрукьаздаса цIуна-къай гьабизе кколеблъи. Амма ХIабибие унго-унгояб хIинкъи гьесдаса гьечIо ва киданиги букIинеги букIинчIо», — ян.
