Гугариялъул рахъалъ дунялалъул чемпионат тIобитIизе буго Казахстаналда 14-22 сентябралда
Баянлъана эркенаб гугариялъул рахъалъ Нур-Султаналда букIине бугеб дунялалъул чемпионаталде Россиялъул тIасабищараб командаялъул мухъилъ ине ругел спортсменазул сияхI. Гьеб тасдикъ гьабуна гьал къоязда, Сочиялда сборазул заманалда рукIарал къецаздаса хадуб. Гьел тIоритIана 57, 74 ва 97 кг цIайиязда. 97 кг цIайиялда «Россиялъул танк» ГIабдурашид Садулаев дандчIвана дагьаб цеве Россиялъул чемпионлъун вахъарав Северияб Осетиялдаса спортсмен Владислав Байцаевгун. Дагъистанияс дандияв къезавизе вукIиналда щаклъи букIинчIо. Гьедин ккезеги ккана, 10:0 хIисабгун ГIабдурашидица Байцаевасда тIад михир бачана, цогIаги баллги кьечIого. Гьединабго хIасил ккана Заур Угуевасдагун Арыйаан Тютринида гьоркьоб букIараб речIчIиялъулги. Дагьаб цебе Польшаялда букIараб Циолковскиясул мемориалалда бергьарав Тютрин, 10:0 хIисабгун, къезавуна дагъистанияс. 74 кг цIайиялда букIана интересаб гугари. Гьеб категориялда дагъистанияв МухIамад КъурбангIалиев дандчIвана Северияб Осетиялдаса спортсмен Заурбек Сидаковгун. ХIалбащадаб гугари унеб букIана ургуялда. Амма, правилаби хвезариялда бан, судияс кIиго нухалъ балл кьуна осетинасе ва гьединго цо балл щвана нилъерасеги. ПалхIасил, гьеб речIчIиялда 2:1 хIисабгун къуна дагъистанияв ва 74 кг цIайиялда дунялалъул чемпионаталде ине мустахIикълъана Заурбек. Гьединго эркенаб гугариялъул рахъалъ дунялалъул чемпионаталде Россиялъул тIасабищараб командаялъул мухъилъ руго МухIамадрасул Идрисов (61 кг), ХIажимурад Рашидов (65 кг), Давид Баев (70 кг), ХIажи Набиев (79 кг), Артур Найфонов (86 кг), ГIалихан ЖабрагIилов (92 кг). Бищунго бакIаб 125 кг цIайиялда Казахстаналъул тахшагьар Нур-Султаналде ине вугев спортсменсул цIар тIасабищараб командаялъул тренеразул штабаз жегиги бицинчIо. Гьенир гIахьаллъизе бегьула Билал Махов ялъуни Анзор Хизриев.
Гьеб чемпионаталда бергьаразе щвезе руго Олимпиялъул лицензиял. 2020 соналда Токиоялда рукIине ругел Олимпиялъул хIаязда гIахьаллъизе рес щвезе ккани, гугарухъан ворчIизе ккола дунялалъул чемпионаталъул финалалъул ункъил бутIаялдегIаги.
